آئـس کریم
رجانکار: اُزیـر مهر
هما روچاں وهدے کہ هاسیں آئس کریم کہ آئی ءِ سر ءَ نیبگ ءُ شربت پِر بیت ارزان اَت، یک ده سالی بچکے آئس کریم ءِ دُکّان ءَ آتک ءُ ٹیبل ءِ دیم ءَ نِشت-
دُکّان ءِ واهند ءَ گلاسے آپ آؤرت ءُ آئی ءِ دیم ءَ ایر کُت-
" هما آئس کریم ءِ نهاد چینچک اِنت کہ آئی ءِ سر ءَ نیبگ ءُ شربت پِر اِنت؟"-
" پنجاه(۵۰) کلدار " دُکّان ءِ واهند ءَ پسّو دات-
بچک ءَ دست کیسگ ءِ نیمگ ءَ بُرت ءُ وتی زرّانی هساب کنگ ءَ لگّ اِت-
" یک سادهیں آئس کریمے ءِ نِهاد چینچک اِنت ؟" ، بچک ءَ پد ءَ پُرس اِت-
لهتے مردم اوشتاتگ ءُ هالیگیں ٹیبل ءِ ودار کنگ اِت اَنت ءُ دُکّان ءِ واهند ءَ هم نی اوپار نہ شُت-
" 35 کلدار " دُکّان ءِ واهند ءَ پہ سوکدلی گْوشت-
بچک ءَ پد ءَ وتی زرّ هساب کُت اَنت-
" من یک سادهیں آئس کریمے لوٹ آں"، آئی ءَ گْوشت-
دکان ءِ واهند ءَ آئس کریم ءِ پجّیگ ءَ بِلّ اوں آؤرت ءُ ٹیبل ءِ سر ءَ ایر کُت ءُ وت شُت-
بچک ءَ آئس کریم وارت، زرّ دات اَنت ءُ چہ اود ءَ رپت-
وهدے کہ دکان ءِ واهند پہ ٹیبل ءِ ساپ کنگ ءِ هاتر ءَ پد ءَ آتک، آ اجکّہ بوت دیست ئِے کہ ٹیبل ءِ سر ءَ بچک ءَ 15 کلدار گیشیں پہ داد ایر کُتگ-
0 Comments