مـن ءَ کَـے ءَ تیـلانک دات

رجانـکار : اُزیـر مـهر

یک هستومندیں مردے ءَ یک باز شرّ رنگیں جنیں چُکّے هست اَت. وهدے کہ جنک سیر ءُ سانگ ءِ واستا جریدگ بوت، جنک ءِ پت ءَ سرجمیں میتگ ءُ بازار ءَ همے جار پِرّینت کہ دْراهیں لائکیں جْوان باید اِنت بیا اَنت ءُ چکّاس ءَ بهر بہ زیر اَنت . هر کس کہ اِے چکّاس ءَ سوب مند بیت ءُ چہ آ دگہ جْواناں باج بارت آ بامرد لیکگ بیت ءُ منی لاڑکیں جنک همائی ءِ بیت

 .

چکّاس ءِ روچ ءَ تیوگیں میتگ ءِ مردم آتکگ اِت اَنت، سجّهیں چیزّ ساجو اِت اَنت. هما جْواناں کہ چکّاس ءَ بهر زُرتگ اَت کُلّیں ساڑی اِت اَنت. لهتے جْوان گوں کرپاسک (Paper) ءُ ند ءَ آتکگ اِت اَنت ءُ آ دگہ جْواناں گوں وت سگار ءُ کاٹار آؤرتگ اَت . ازگاریں مرد ء‍َ چکّاس ءَ بهر زیروکیں دْرستیں جْوان وتی اوژناگ ءِ تلاوگ (Swimming Pool) ءِ کِرّ ءَ بُرت اَنت ءُ دیم ئِے گوں جْواناں کُت ءُ درّائینت ئِے

 ‌" شُمئے تـھ ءَ هر کس کہ تلاوگ ءِ اِے سر ءَ بِگر داں آسر ءَ اوژناگ کنت ءُ درکیت من وتی جنک ءَ گوں همائی ءَ سانگ دے آں". ایشی ءَ چہ ابید من آئی ءَ پانزده (15) ملین داد بکش آں، یک گاڑی یے ءُ یک لوگے هم دے آن ئِے دانکہ آ گوں وتی لوگبانک ءَ یک شرّین ءُ آسودگیں زندے بہ گْوازین اِیت . من تلاوگ ءِ آ دست ( گُڈّی سر ءَ ) وتی زامات ءِ ودار کن آں . شُما اللّه ءِ باهوٹ اِت

. دْراهیں جْوان گل ءَ بال اِت اَنت ءُ آ کٹَّگ ءُ باج برگ ءِ بارو ءَ پِگر ءُ سسّا کَنَگ ءَ اِت اَنت. وهدے کہ آیاں وتی پشکانی کَشّگ بندات کُت اناگت ءَ یک پِرّکے (Helicopter) تلاوگ ءِ بُرزی نیمگ ءَ آتک ءُ تلاوگ ءِ تـھ ءَ گانڈو دور دات ئِے . دْراهیں جْوان تلاوگ ءَ چہ پُشت ءَ کِنز اِت اَنت ءُ پہ اِشتاپی پد ءَ وتی پشک گْور ءَ کُت اَنت اِش . آیانی تـھ ءَ لهتے دل ایکیم ءُ دلپْروش بوت اَنت ءُ گْوشت اِش

 " اِے وَ گنوکی یے ، کَے وت ءَ را مرگ ءِ دپ ءَ چَگل دنت . ما هم چار ایں کہ کَے گوں جنک ءَ سانگ کنت ، کس کُت نہ کنت !"

.اناگاه ءَ آیاں تلاوگ ءِ تـھ ءَ آپ ءِ ترینزُّک ءِ توار اِشکُت هر یک مردمے بهمانگی چارگ ءَ اَت کہ یک جْوانیں بچکے چو بَٹ ءِ داب ءَ آپ ءِ تـھ ءَ ایرکپتگ اَت ءُ اوژناگ کَنَگ ءَ اَت ءُ وت ءَ را چہ گانڈواں پهریزگ ءَ اَت ءُ تلاوگ ءِ آ دست ءَ روگ ءَ اَت . گُڈّ سر ءَ کہ همے بچک تلاوگ ءِ دومی سر ءَ رس اِت ازگاریں مرد ءَ باور بَیَگ ءَ نہ اَت . آئی ءَ جْوانیں بچک ءَ چہ پُرس اِت

 " بہ گْوش تو چے لوٹ ئے مرچی تو هرچی لوٹ ئے تئی واهشت پُورا کَنَگ بیت" . بلے بچک انگت ءَ هوش ءُ سار ءَ نہ اَت . گُڈّ سر ءَ کہ هوش ءَ آتک گُڑا اِے دزّبندی کُت ئِے کہ

 " من ءَ هما مردم ءَ پیش بِدار اِت کہ همائی ءَ من ءَ اِے تلاوگ ءِ تـھ ءَ تیلانک داتگ

 ".

اِے کِسّہ مارا دو گْرانبهائیں درونت دنت .

اولی درونت -: تو نہ زان ئے کہ تو چینچو لائک ءُ بودناک ئے داں کہ تو تیلانک دیگ مہ بہ ئے . همے وهد ءَ گانڈو ماں تلاوگ ءِ تـھ ءَ دور دیگ بوتگ اَنت آ بُندر ءَ گانڈو نہ بوتگ اَنت بلکیں آ نکلی لبّڑ ءِ گانڈو بوتگ اَنت

.

دومی درونت -: برے هما مردم کہ مارا گانڈوانی (جنجالانی ) دیم ءَ تیلانک دَے اَنت بگندئے مارا مئے مادِنیں راه ءِ سر ءَ روگ ءَ کُمک ءُ مدت کَنَگ لوٹ اَنت.

برے برے شرّیں جاورانی رسگ ءِ هاتر ءَ مارا نگیگین ءُ هرابیں جاورانی تـھ ءَ گْوزگ لوٹ اِیت.

سـرشون:

اِے کِسّہ چہ انٹرنیٹ ءَ (Motivational Stories) کِسّهانی بُکچہ ءَ چہ زیرگ بوتگ. ایشی ءِ انگریزی سرنام (Who Pushed Me ) بُوتگ.