ناپاداریں دُنیا - رجانکار: اُزیـر مِهـر

یک رندے یک مردمے ءَ وتی واب ءِ تہ ءَ دیست کہ یک شیرے آئی ءِ رند ءَ کپتگ اَت مرد دْرچک ءِ نیمگ ءَ تتک ءُ دْرچک ءِ سر ءَ سر کپت ءُ یک شاهے ءِ سر ءَ نِشت. آئی ءَ جهل ءَ چاراِت ءُ دیست کہ شیر انگت ءَ همود ءَ اَت آئی ءِ ورگ ءِ هاتر ءَ ودار کنگ ءَ اَت.


 آشاه گوں دْرچک ءَ همگرنچ اَت آئی ءَ دیست کہ دو مُشک دْرچک ءِ کش ءُ گْور ءَ چکرّگ ءَ اَنت ءُ شاه ءَ ورگ ءَ اَنت یک مُشکے سیاه اَت ءُ دومی مُشک اسپیت اَت. شاه نی زیت کپگی اَت. مرد ءَ پد ءَ گوں تُرس ءُ بیمّ ءَ جهل ءَ چار اِت ءُ دیست ئِے کہ یک مزنیں سیاهیں مارے اتکگ ءُ دْرچک ءِ چیر ءَ نشتگ. مار ءَ وتی دپ پچ کُت کہ مرد دْرچک ءَ چِہ بہ کپ اِیت ءُ من وران ئِے-


 چریشی ءَ پد مرد ءَ وتی کش ءُ گْور چار اِت کہ بلکیں چیزّے هست کہ من آئی ءَ را بدار آن ءُ جهل ءَ مہ کپ آں. آئی ءَ دِگہ یک شاهے دیست کہ آ شاه ءَ بینگے پِر اَت ءُ آئی ءَ چِہ بینگ پیٹّگ ءَ اَت مرد ءَ لوٹ اِت کہ من یک تْرمپے بینگ ءِ تام ءَ بہ چ‍َشَ آں. گڑا آئی ءَ وتی لِلِّک بینگ ءِ نیمگ ءَ بُرت ءُ بینگ ءِ رتکگیں تْرمپ ءِ لزّت ءُ تام ئِے چَش اِت. 



بینگ ءِ تام سکّ وشّ اَت آئی ءَ لوٹ اِت کہ من دِگہ یک تْرمپے بینگ بہ ور آں. وهدے کہ آئی ءَ بینگ وارت گڑا آ بینگ ءِ وشّی ءُ شیرکنی ءِ تہ ءَ گار ءُ بیگْواه بوت. همے وهد ءَ آ مرد بے هیال بوت دوئیں مُشکاں کہ آ دْرچک ءِ شاه ءَ ورگ ءَ اِت اَنت ءُ هما شیر ءَ کہ جهل ءَ ودار کنگ ءَ اَت ءُ هما مار ءَ کہ دپ ئِے پچ اَت ءُ آئی ءِ ورگ ءِ وداریگ اَت ساهتے ءَ پد آ مرد واب ءَ چِہ پادآتک. 



اِے واب ءِ مانا ءُ تابیر ءِ زانگ ءِ هاتر ءَ اسلام ءِ یک نیک ءُ پارسائیں (عالم) زانت کارے ءِ کِرّ ءَ شُت. زانت کار(عالم) ءَ درّائینت "هما شیر کہ تو وتی واب ءِ تہ ءَ دیستگ آ تئی مرگ اِنت اِے هر وهد ءَ تئی رند ءَ کیت گوں هر کُجا تو روئے اِے تئی پد ءَ کپ اِیت. دوئیں مُشک یکّے سیاهیں ءُ دومی اسپیتیں مُشک تئی شپ ءُ روچ اَنت. سیاهیں مُشک شپ اِنت ءُ اسپیتیں مُشک روچ اِنت. اِے دوئیں تئی کش ءُ گْور ءَ چکر اَنت ، یک دگرے ءَ رند کاینت ءُ تئی وهد ءَ هلاس کن اَنت ءُ ترا مرگ ءِ نزّیک ءَ کار اَنت.



 مزنیں سیاهیں مار گوں وتی تهاریں دپ ءَ تئی مانش اِنت اِے هر وهد ءَ تئی وداریگ اِنت کہ تو کدی ایشی ءِ تہ ءَ کپ ئے. بینگ اِے دنیا ءِ وشّی ءُ آسودگی اَنت. ما لوٹ ایں کہ اِے دنیا ءِ وشّیانی تام ءُ لزّت ءَ بہ چَش ایں بلے اِے بینگ باز شیرکن اِنت پد ءَ ما دِگہ یک تْرمپے ءِ تام ءَ چَش اِیں ءُ پد ءَ ----------------یک تْرمپے ءِ تام ءَ چَش اِیں ءُ پد ءَ -----------------------. همے وهد ءَ ما ایشی ءِ تہ ءَ گار ءُ بیگْواه بہ اِیں ءُ ما شموشکار بہ اِیں وتی وهد ءِ بابت ءَ ما بے ترانگ بہ اِیں وتی مرگ ءِ بابت ءُ ما بے هیال بہ اِیں وتی مانش (کبر) ءِ بابت ءَ.



 اِے دُنیا یک اژدهائیں مارے ءِ پیم ءَ اِنت باز نرم اِنت پہ دست جَنَگ ءَ بلے پُرّیں چہ کُشوکیں زهر ءَ نادانیں مردم ایشی ءِ دیوانگ ءُ شیدا بنت ءُ دنیا اِے پیمیں مردماں ردّ دنت ءُ داناهیں مردم وت ءَ را چہ ایشی ءَ ءُ ایشی ءِ مکر ءُ پریباں رکّین اَنت ءُ پهریز اَنت.


هلاس


سـرچمگ: ماهتاک کندیل بلوچی تاک 3