لَچّہ: منی تھنائی

لچّہ کار : اُزیر مھرؔ

منی تھنائی من ءَ چہ وتی ارواہ گیشتر دوست

تھار ءُ لُنجیں شپانی ماھکانی

دیگر ءِ سارتیں ھوا ءِ امبوہ

رولہ ءِ جلواھناکیں تاھیر

شینک، استین ءَ چہ اسپیت تِر

منی تھنائی منی مُجّتی ھمراہ

تو داں کد گوں من ھمراہ بئے؟ 

تو داں کد گوں من مُلمہ بئے؟

چاریں آتراپاں چکر آں مُپت ءَ

نیست اِنت مونِس ءُ گمواریں ھمبلے

بوتن ءِ روچ ءَ بگر داں مانش

کہ من ءَ دلپھکی ءَ ساٹیت ءُ رکّینیت چہ دْراھیں ھمبلاں شَرتِر

منی تھنائی ھُدا ءِ داتگیں داد اِنت

پمّن ءَ گنجیں سوگات اِنت

منی تھنائی منی ارواہ ءِ میزّریں دْرچکے

نیبگ ءُ شیرکنیں بُرّ ءُ بَرّ

کار اِیت ھر وھد ءَ پمّن ءَ ھزّامے

نئیت چُشیں تاکریچے کہ اَچ من ءَ بہ پُلیت ءُ بہ بارت منی دوست ءَ

ناگتيں بئیت چُشیں وھدے گُڑا

پمّن ءَ بود نہ کنت زِرد پد ءَ !

پمّن ءَ بود نہ کنت زِرد پد ءَ !