گیدی کِسّہ: موکو ءُ لَسّ سسّا

رجانکار: اُزیر مھرؔ

باز سال پیسر یک موکویے ھست اَت آئی ءِ نام انانسی اَت۔ آئی ءَ لوٹ اِت کہ آ دنیا ءِ دْرستاں چہ مستریں ازگار ءُ مستریں توانائیں سھدار بہ بیت۔ یک روچے آئی ءَ ھیالے آتک۔  آئی ءَ جُلگھیں گیدی ءِ ھر کُنڈ ءُ دمگ ءِ دْراھیں لسّ سسّاھاں جم کنگ ءِ پیسلہ کُت۔ اِے کار ءِ کنگ ءَ پد مردم آئی ءِ گْور ءَ وتی جیڑھانی توجیل ءِ جُست کنگ ءِ ھاتر ءَ کاینت۔ پرے ھاتر ءَ آ مردماں سر ءُ سوج کنگ ءَ مزنیں زَرّ ءُ کلدارے گِپت ءُ ازگارے جوڑ بیت۔ گڑا آئی ءَ وتی شَور ءِ سر ءَ کار کنگ بندات کُت۔

موکو ءَ لسّ سسّا جم کُت اَنت ءُ یک مزنیں شیشگ ءِ بوتلے ءِ تہ ءَ مان کُت اَنت۔ وھدے کہ آئی ءَ وتی کار سرجم کُت ءُ تیوگیں دنیا ءِ ھر کُنڈ ءَ چہ لسّ سسّا یکجاہ کُت اَنت گڑا بوتل ءِ دپ ئِے بند کُت۔ آئی ءَ ھیال کُت کہ آ اِے بوتل ءَ چیر دنت دانکہ کسّ شوھاز اِت ئِے مہ کنت۔ جیڑہ ھمیش اَت کہ آ اِے بوتل ءَ کجا چیر بہ دنت کہ چہ لسّ سسّا ءَ چکار اَت۔ آئی ءَ جیڑ اِت کہ مزنیں دْرچک ءِ سر سلامتیں جاھے۔ انانسی موکو ءَ بوتل گوں ساد ءِ ٹُکّرُے ءَ وتی لاپ ءَ بست۔ وھدے کہ آئی ءَ دْرچک ءِ سر ءَ سر کپگ بندات کُت آئی ءَ جنجالی یے مار اِت پرچا کہ بوتل گوں آئی ءِ لاپ ءَ بستگ اَت ءُ پہ آئی ءَ اَڑ ءُ جنجال پیداک کنگ ءَ اَت۔ آئی ءَ نہ زانت کہ آ چتور چہ اِے جیڑہ ءَ زہ اِت کنت۔ اناگت ءَ یک بچکے کہ نزّیک گْور ءَ گْوزگ ءَ اَت آئی ءِ کِرّ ءَ آتک ءُ شَورے دات ئِے کہ اگاں آ بوتل ءَ وتی بَڈّ ءَ بہ کنت داں آ دْرچک ءِ سر ءَ سرکپت کنت۔  وھدے کہ موکو ءَ اِے کسانیں لسّ سسّا ءَ اِش کُت گڑا آ وتی سر ءَ پشومان بوت چیا کہ آئی ءَ وَ دْراھیں لسّ سسّا یکجاہ کُتگ اِت اَنت۔ آئی ءَ بوتل زمین ءِ سر ءَ دور دات ءُ پْروشت ئِے۔ پمیشکا لسّ سسّا ماں ٹُکُّراں بھر ءُ بانگ بوت ءُ دنیا ءِ چاریں کُنڈاں شِنگ ءُ تالان بوت۔ ھرکس ءَ کمّے لسّ سسّا رس اِتگ بلے انانسی ءِ سبب ءَ کسّ ءَ  سرجم ءَ نہ رس اِتگ۔

      

   

سَرشون:

A Spider And Commonsense

Adapted From Caribbean Folk Tale

Page Number:20

From The Magazine The Aspirations 2014-2016