کد سبز بیت مئے گُنگدام واڑ؟

Animal Farm 

جارج آرویل ءِ گِدار انیمل پارم ءِ سر ءَ چمّشانکے

نبشتہ کار: اُزیر مھرؔ

انیمل پارم برتانیہ ءِ نامی ائیں نبشتہ کار جارج آرویل ءِ الگیری دْروشم ءَ نبشتگیں گِدار اِنت کہ اولی رند ءَ ۱۷ ساچان ۱۹۴۵ ءَ ماں لندن، انگلینڈ ءَ چھاپ ءُ شِنگ بیتگ ءُ ۲۵۰۰۰۰ ءَ گیش دانگ بھا بیتگ۔ اِے گِدار دہ درانی تہ ءَ بھر کنگ بیتگ۔ اِے کتاب ءِ کِسّہ واڑ ءِ گُنگدامانی یک گَلّے ءِ ئیگ اِنت کہ وتی واڑ ءِ سروکیں انسان ءِ گون ءَ سرکشی کن اَنت ءُ یک انچیں چاگردے ءِ جوڑ کنَگ ءِ امیت وار بنت کہ اود ءَ دْراھیں گُنگدام یک برابر بہ بنت، آجو ءُ گَل ءُ شاد بہ بنت۔ بلے گُڈّسر ءَ ھمے سرکشی ڈکٹیٹر ءُ زالمیں ھیکّ نیپولین ءِ راھشونی ءَ دگابازی ءِ ارجان بیت ءُ گُنگدام واڑ ءِ جاورھال چِدوگیشتر ھراب ءُ تراب بنت اِنت کہ پیسر ءَ بِھ چوش نہ بیتگ اَنت۔

اِے گِدار ءِ تہ ءَ  جارج آرویل ءَ روس ءِ آشوب گُنگدام واڑ یا انیمل پارم ءِ دْروشم ءَ بیان کُتگ۔ بُندر ءَ ایشی ءِ بُنگپّ سویت یونین ءِ ءُ کمیونِزم ءِ کست ءُ کینگ، دْروھکاری، بے ایمانی ءُ کرپشن،ناانساپی، لبّ ءُ لالچ، جاندُزّی ءُ بازیں تُرس ءُ بیمّ ءَ پیدا بیتگیں زلم ءُ زوراکی ءَ پیش دار اِیت۔ ھمے جھانی جیڑھانی سبب اِنت کہ اِے بُنگپّ ھر دور ءُ باریگ ءُ ھر پدریچ ءِ ھاتر ءَ نوکتر بیت۔

جارج آرویل ءِ نِزّ ءَ اِے کِسّہ ھما چِست ءُ ایرانی پَدّرائی دنت اِنت کہ چرآئی ءِ سبب ءَ ۱۹۱۷ ءَ روس ءِ آشوب ءَ سر چِست کُتگ ءُ سویت یونین ءِ اسٹالین ءِ زمانگ ءُ باریگ ءِ بابت ءَ اِنت۔ آریل وت یک جمھوری سوشلسٹے بیگ ءِ پجّیگ ءَ جوسِپ اسٹالین ءِ نگدکار ءُ کِچّہ چینے بیتگ ءُ آئی ءَ گوں اسٹالین ءَ پمیشکا دُژمنی بیتگ کہ آ ماسکو ءِ سر ءَ واجھی کنگ ءَ بیتگ۔ گڑا اسپین ءِ تھی جنگ ءِ دور ءُ باریگ ءَ ھمے تب ءُ میل ءَ آرویل پرمات کہ وتی کُتہ کاریاں گْوناپے بہ دنت ءُ بہ ساچ اِیت اِش۔

آئی ءَ لیک اِت کہ سویت یونین ناروائی ءُ زوراکی ءِ دور ءَ یک سِنگ دلیں ڈکٹیٹرشِپے جوڑ بیتگ ءُ  آئی ءِ راھشون یک انچیں زوراک ءُ توانمندیں مردمے کہ مردم آئی ءِ بے 

کساس اِزّت ءُ شرپ ءَ کن اَنت۔

جارج آرویل اِیوان ڈیوِس ءِ سر ءَ نمدی یے نبشتہ کنت گڑا گْوش اِیت کہ انیمل پارم اسٹالین ءِ ھلاپ ءَ  یک تَژنی کِسّھے۔ ۱۹۴۶ ءَ نبشتگيں نبشتانک کہ آئی ءِ سرنام اِنت من پرچا نبشتہ کن آں ءِ تہ ءَ جارج ءَ نبیسّ اِتگ کہ انیمل پارم اولی کتاب اِنت کہ من آئی ءِ تہ ءَ گوں سرجمیں ھوش ءُ ھیال ءَ ھمے جُھد کُتگ کہ من چی کنگ ءَ آں بزاں دو جتائیں چیزّ یکے سیاسی مول ءُ مراد ءُ دومی اِزمی مول ءُ مراد سرجم ءَ یکیں کالِب ءُ سانچہ ءِ تہ ءَ آرگ ءِ جھد کُتگ۔  

George Orwell

جارج آرویل ءَ اِے کتاب نومبر ۱۹۴۳ ءُ پروری ۱۹۴۴ ءِ میان ءَ نبشتہ کُتگ وھدے کہ برتانیہ جنگ ءِ زمانگ ءَ جرمنی ءِ نازی ءِ ھلاپ ءَ گوں سویت یونین ءَ ھمگرنچ ءُ ھمگنگل بیتگ۔ برتانیہ ءِ مھلوک ءُ زانتکار ءُ دانشوراں اسٹالین سکّ باز شرپ ءُ اِزّت دات ءُ ھمے لیکہ آرویل ءَ دوست نہ بوت۔

بندات ءَ اِے کتاب ءِ سیاھگ برتانیہ ءُ امریکہ ءِ بازیں شِنگ کار ءُ چاپاراں نہ مَنّ اِتگ ءُ ڈالچار کُتگ۔ آرویل ءِ وتی دوزواہ ویکٹر گالنچ اوں کتاب ءِ چھاپ ءُ شِنگ کنگ ءَ جاڑیگ نہ بوت ءُ اِے کار ئِے مھتل کُت۔ بلے رند ءَ سیکر ءُ واربرگ نامیں شِنگکاریں اداراھاں مَنّ اِیت ءُ چھاپ کُت ءُ انگلیڈ ءُ امریکہ ءِ تہ ءَ مزنیں کَچّ ءُ کساسے ءَ بھا بوت۔  اِے کتاب ءَ بھا بیگ ءِ وھد ءَ مزنیں کساسے ءَ سوبمندی رس اِت وھدے کہ اِے کمّے دیم ءَ آتک ءُ سھرا بوت پرچا کہ میان استمانی سیادی ءِ تب ءُ مزاج بدل بیتگ اِت اَنت ءُ جنگ ءِ نوبت ءُ باریگ ءَ ملکانی  گوں یک دومیگ ءَ گَلّ بندی ءُ ھمگرنچی ءِ سوب آسر دیم پہ سرد جنگ ءَ شُت۔

تاکبند ٹائم ءَ انگریزی زبان ءِ ۱۹۲۳ بہ گِر داں ۲۰۰۵ ءِ سد جْوانیں گِدارنی لَڑ ءَ اِے کتاب ھم گِچین کُتگ۔ ماڈرن لائبریری ءِ بیستمی سدی ءِ گِچین کُتگیں جْوانیں گِدارنی لَڑ ءَ اِے گِدار ۳۱ نمبر ءَ پیش داشتگ۔ اِے کتاب ءَ ۱۹۹۶ ءَ  ریٹروسپیکٹیو یوگو داد دیگ بیتگ ءُ چریشی ءَ ابید روبرکتی دنیا ءِ مزنیں ءُ جْوانیں کتابانی گچین کُتگیں لَڑ ءَ ھوار اِنت۔

دی رچمنٹ تامر شِنگار ءِ نیمگ ءَ ۱۹۵۴ ءَ جان ھیلِس نامیں رِدکارے ءَ انیمل پارم گِدار ءِ سر ءَ یک انیمیٹڈ تامرے جوڑ کتگ ءُ آئی ءِ تہ ءَ موریس ڈِنم ءُ گارڈن ھیت ءِ پیمیں ازمکارانی توار کارمزگ بیتگ اَنت۔ چریشی ءَ ابید ھال مارک انٹرٹئنمنٹ ءِ نیمگ ءَ ۱۹۹۹ ءَ جان اسٹیپنسن نامیں رِدکارے ءَ اوں ایشی ءِ سر ءَ تامرے جوڑ کُتگ۔ آئی ءِ تہ ءَ کیلسی گرامر پِٹرِک اسٹیورٹ ءُ پیٹر اسٹینو نامیں ازمکارانی توار کارمرز کنگ بیتگ اَنت۔ 

تامراں ابید اِے گِدار تواربند ءِ شِکل ءَ ھم باز مردماں ریکارڈ کُتگ ءُ شِنگ کنائینتگ۔ اِے رِد ءَ ٹیموتی وِیسٹ نامیں مردے ءَ اِے گِدار ۱۹۹۶ءَ پینگوئین۔ یو ایس او ءِ نیمگ ءَ تواربند ءِ دْروشم ءَ شِنگ کُتگ۔

انیمل پارم ءِ پلاٹ:

وِلینگڈن، انگلینڈ ءِ نزّیک گْور ءِ مینر واڑ گوں توامیں گُنگدامانی مُچّی ءَ  پہ سرکشی ءَ رس اِتگ اَت۔ پرچا کہ آ وتی لاپرواہ ءُ ھنوشیں واڑ ءِ مستر مسٹر جونز ءِ گْور ءَ  ڈالچار بیتگ اِت اَنت۔ یک شپے بوھیر ءُ کماشیں گیابانی ھیکّ پیریں میجر یک دیوانے اڈ دنت ءُ دْراھیں گُنگداماں وتی ھما واب ءِ بابت ءَ گْوش اِیت کہ آئی ءِ تہ ءَ سجّھیں گُنگدام گوں تپاکی ءُ ھم سَنّتی یکجاہ زند گْوازین اَنت ءُ ھِچّ انسان آھانی سر ءَ زُلم ءُ زوراکی نہ کنت نَے کہ آھانی واکدار ءُ واجہ بیت پمیشکا میجر انساناں شکست دیگ ءُ چہ آھاں باج برگ تلب کنت۔ آ گُنگداماں یک آشوبی سوتے ھیل دنت کہ آ سوت ءِ سرنام اِنت " انگلستان ءِ زور آوریں رستراں"۔ وھدے کہ پیریں میجر بیران بیت گڑا سَے جوانیں ھیکّ اسنوبال، نیپولین ءُ اسکیولر وتی اُگدہ ءُ کاراں سنبھال اَنت ءُ مسٹر جونز ءَ چہ واڑ ءَ درکنگ ءِ ھاتر ءَ یک زھرشانی ءُ سرکشی یے کن اَنت ءُ ھمے زمین ءُ جائیداد ءِ نام ءَ کن اَنت گُنگدامانی واڑ۔ آ گُنگدامانی ھکّانی پھازگ ءِ ھاتر ءَ ھپت پارسائیں کانود ءُ  راھبند ایر کن اَنت ءُ اِے راھبند ءِ نام ءَ کن اَنت گُنگدامی یا انیملزم۔ ھپت پارسائیں کانود ءُ راھبند ایش اَنت:

۱۔ توری چُنائیں جاورھالے بہ بیت، دو پاد مئے دژمن اَنت۔

۲۔ چارپاد ءُ ھما سھدار کہ بانزل اِش پِر مئے دوست ءُ دوزواہ اَنت۔

برے برے گُنگداماں چوش ھم گْوشت کہ چار پاد شَرّ ءُ دو پاد ھراب۔

۳۔ ھِچّ گُنگدام پوشاک پِر نہ کنت۔

۴۔ ھِچّ گُنگدام نِپادانی سر ءَ وپت نہ کنت۔

۵۔ ھِچّ گُنگدام تُرندآپ وارت نہ کنت۔

۶۔ ھِچّ گُنگدام دومی گُنگدام ءَ کُشت نہ کنت۔

۷۔ کُلّیں گُنگدام برابر اَنت۔

 چہ دْرستاں پُر ارزشتیں راھبند ھمیش اِنت کہ "دْراھیں گُنگدام برابر اَنت"۔ اِے کانود ءُ پرمان گوں ٹوھیں آباں واڑ ءِ دیوال ءِ سر ءَ یک نیمگے ءَ نبشتہ اَت۔ اسنوبال گُنگداماں وانگ ءُ نبشتہ کنگ ھیل دنت ءُ نیپولین کُچکانی گُلّڑاں گُنگدامانی راہ ءُ راھبنداں سوج دنت۔ آھانی گْور ءَ ورگ باز اَت ءُ واڑ ءِ گُنگدمانی گُزران پہ الکاپی ءَ بیگ ءَ اَت۔ھیکّاں وت ءَ را راھشونی ءِ اُگدھاں رسینت ءُ وتی جان سلامتی ءِ ھاتر ءَ گِھیں ءُ ھاسیں وردن ءُ وراک گچین کُت۔ مسٹر جونز ءُ آئی ءِ ھمراھاں پد ءَ واڑ ءِ سر ءَ بے سوبیں اُرش ءُ باج برگ ءَ پد اسنوبال گُنگدام واڑ ءَ نوک تِر کنگ ءِ ھاتر ءَ گْواتی کارجاھے ءِ جوڑ کنگ ءِ جار ءَ پِرّین اِیت۔ نیپولین وتی کُچکاں اسنوبال ءِ سر ءَ یل دنت کہ اسنوبال وت ءَ را یک راھشونے گْوش اِیت۔   نیپولین واڑ ءِ کانود ءُ راھبندانی تہ ءَ بدلی کار اِیت ءُ ھیکّانی دیوان ءُ گِدار ءِ بدل ءَ یکّ گَلّے جوڑ کنت کہ واڑ ءِ کارانی ڈُبّہ ھماھانی سر ءَ اِنت۔ نیپولین چہ یک جوانیں ھیکّ کہ آئی ءِ نام اِنت اسکیولر گواتی کارجاہ ءِ ھیال ءَ تلب کنت۔ دْراھیں گُنگدام گواتی کارجاہ ءِ جوڑ بیگ ءِ ھاتر ءَ  باز جُھد ءُ جکانسری کن اَنت ھمے اوست ءَ کہ وھدے گْواتی کارجاہ جوڑ بیت تہ آھانی زند وشّ ءُ آسودگ بیت۔ وھدے کہ توپان ءُ شَرتگ ءَ پد گُنگداماں دیست کہ گْواتی کارجاہ کرُتکگ ءُ ڈُر اِتگ گڑا نیپولین ءُ اسکیولر گُنگدامانی سرپد کنگ ءِ ھاتر ءَ ھمے گْوش اَنت کہ اسنوبال آھانی کاراں بیران کنگ ءَ اِنت ءُ واڑ ءِ ھالیگ کنگ ءِ ھاتر ءَ نیپولین آئی ءَ را ھمے بُھتام ءَ جنت کہ آ مئے کْوھنیں بدواہ ءِ دوزواہ جوڑ بیتگ۔ وھدے کہ لھتیں گُنگداماں مادگ واڑ ءِ جنگ گیر آورت گڑا جنگ ءِ میان ءَ نیپولین ھِچّ جاہ ءَ سھرا نہ اَت گڑا اسنوبال ءِ بنّام کنگ ءِ ھاتر ءَ نیپولین ءَ آ مسٹر جونز ءِ ھمپت ءُ مردم گْوشت ءُ وت ءَ را جنگ ءِ بامرد زاھر کُت۔ " انگلستان ءِ زور آوریں رستراں" سوت بدل کنگ بوت ءُ ایشی ءِ جاگہ ءَ براھمدگ نیپولین گْوشگ بوت۔ گُنگداماں ھمے مار اِت کہ نی آھانی زندمان ساکِم اِنت ءُ  چہ مسٹر جونز ءِ واجھی دور ءُ باریگ ءَ گھتر اِنت۔

مسٹر پریڈرِک کہ ھمساھگیں واڑ ءِ مستر ءُ سروک اِنت گوں تْراکناکیں شُورہ ءُ پاوڈرانی کارمرزی ءَ گُنگدام واڑ ءِ سر ءَ اُرش کنت دوبربستگیں گْواتی کارجاہ ءَ تْرکینگ لوٹ اِیت بلے گُنگدام گوں وتی سجھیں زور ءُ تاکت ءَ  اِے جنگ ءَ باج بر اَنت۔آ داں وتی گُڈّی ھاٹیگ ءُ توان ءَ جنگ کن اَنت۔ چرآھاں بازینے بیران بیت ءُ بازینے ٹپّی ءُ ٹوری بیت آھانی پجّیگ ءَ یک کارکنوک ءُ جُھدکاریں اپس کہ ھر وھد گْوش اِیت من گیشتر جُھد ءُ جکانسری کن آں بزاں باکسر ھم ھوار اِنت۔ باکسر لھتیں وھد ءِ گْوزگ ءَ پد وَشّ ءُ سلامت بیت ۔ بلے باکسر ھما وھد ءَ سکّ کپت ءُ پدْرد بوت وھدے کہ گْواتی کارجاہ ءِ سر ءَ کار ءَ اَت۔  چریشی ءَ پد باکسر اسپانی کساب ءِ وین ءَ کنگ بیت ءُ برگ بیت بلے اسکیولر گُنگداماں ھمے گپّ ءَ سرپد کنائین اِیت کہ گُنگدامانی نادْراھجاہ ءِ ھاتر ءَ اِے وین چہ اسپ ءِ کسابانی گْور ءَ بھا گِرگ بیتگ ءُ پیسریگیں واھُند ءِ جتگیں سائن بورڈ دوبر رنگ ءُ بدل کنگ نہ بیتگ اَنت۔ گُڈّسر ءَ آیوکیں روچ ءَ اسکیولر آئی ءِ مَرگ ءِ ھال سر کنت ءُ پہ آئی ءِ پاکمِری ءِ جار ءِ پِرّینگ ءَ پد آئی ءِ پُرس ءِ دیوانے برجم دار اِیت۔ بلے راستی ھیش اِنت کہ نیپولین ءَ پہ وت ءَ ءُ وتی نزّیکیں دیوان ءِ باسکاں  وِیسکی شراب بھا زیرگ ءِ ھاتر ءَ  گوں اسپ ءِ کساب ءَ باکسر ءِ سودا ءُ باپار ءِ شَور کُتگ۔

سال گْوز اَنت۔ گْواتی کارجاہ پد ءَ جوڑ کنگ بیت ءُ دومی شَرّ کنگ بیت چریشی ءَ گُنگدام واڑ ءَ باز سیتّ ءُ نپ اِنکم ءِ شِکل ءَ رس اِیت۔بلے ھما ھیال ءُ لیکہ اسنوبال ءَ گْوشتگ اَنت کہ تبیلہ ءَ لین مان بہ بیت، گرم ءُ تچوکیں آپ مان بہ بیت نیپولین ءِ اِے گپّ ءِ پلّہ مُرزی ءَ شموشگ بیتگ اِت اَنت کہ آسیدگ ءُ وژھالیں گُنگدام سادگیں زندے گْوازین اَنت۔ باکسر ءَ ابید بازیں گُنگدام کہ آھاں سرکشی ءَ بھر زُرتگ اَت یا وَ مُرتگ اِت اِنت یا پیر بیتگ اِت اَنت۔ مسٹر جونز چہ وتی واڑ ءَ در رَوگ ءُ یلہ دیگ ءَ پد آ اوں بیران بوت۔ ھیکّاں انسانی ھیل ءُ آدت زُرت اَنت ءُ ھماھانی چھرگ اِش جت۔ وھدے کہ آ تچک ءَ گْوست اَنت آھاں چابُک دست اِت اَنت، تْرُندآپ اِش نوش اِت ءُ پوشاک اِش گْور ءَ کُت۔  رند ءَ نیپولین ءُ آئی ءِ ھمراھیں ھیکّاں چیروکائی ھپتیں راھبندانی سر ءَ شَرّی سر ءَ چمّشانک دات ءُ چار اِت ءُ بدلی آرگ ءِ ارادہ کُت اِش دانکہ آ وت ءَ را بے راھبندی ءُ کانود پروشی ءِ ڈوبہ ءَ بہ چُٹین اَنت۔ آھاں اِے راھبندانی تہ ءَ بدلی آورت:

۴۔ ھِچّ گُنگدام پوش ءُ شیٹّ ءِ نِپادانی سر ءَ وپت نہ کنت۔

۵۔ ھِچّ گُنگدام بے کِساس تُرندآپ وارت نہ کنت۔

۶۔ ھِچّ گُنگدام دومی گُنگدام ءَ بے سبب ءَ کُشت نہ کنت۔

   گُڈّسر ءَ ھپت پارسائیں راھبند پھک ءَ بدل کنگ بوت اَنت ءُ آھانی جاہ ءَ تھنا دو گالرِدانی تہ ءَ تیوگیں راھبند بیان کنگ بوت اَنت۔

اولی راھبند۔

دْراھیں گُنگدام برابر اَنت بلے لھتیں گُنگدام چہ دومی گُنگداماں گیشتر برابر اَنت۔

دومی راھبند۔

چار پاد شَرّ ءُ دو پاد چِدو شَرّ تِر اَنت۔

نیپولین ءَ شام ءِ وھد ءَ ھیکّ ءُ ھندی واڑ ءِ مسترانی ھاتر ءَ دیوانے برجم داشت ءُ گوں نوکیں گَلّ ءُ مردمانی ھمگرنچی ءِ شاتکامی کُت۔  آئی ءَ آشوبی دود ءُ ربیتانی کار چہ ھُنڈال ءَ گْوتک ءُ ھلاس کُت اَنت ءُ واڑ ءِ نام پد ءَ مینر واڑ ایر کُت۔ مردم ءُ ھیکّ پتّائی لیب کن اَنت یک دومیگ ءِ دروگیں ساڑا ءُ توسیپ ءَ کن اَنت ءُ لیب ءِ سر ءَ بے ایمانی ءُ کِلّی کن اَنت۔ نیپولین ءُ واڑ ے ءِ مستر مسٹر پِلکنگٹن یکیں وھد ءَ ھم گونگیں پَتّا ءِ کپگ ءَ کوکّار کنان ءَ جنگ ءَ بندات کن اَنت کہ آ گْوش اِیت پیسر ءَ تو دگا داتگ ءُ آ گْوش اِیت پیسر ءَ تو من ءَ رَد داتگ۔ وھدے کہ گُنگدام چہ ڈَنّی نیمگ ءَ مرد ءُ ھیکّ ءِ نیمگ ءَ چار اَنت گڑا آ دوئینانی تہ ءَ پرک ءُ تپاوتے کُت نہ کن اَنت۔

  نی ما کمّے کارِستانی بابت ءَ گپّ کن اِیں۔

اِے گِدار ءِ تہ ءِ کارستانی تہ ءَ مزنیں اولی کارست کہ مئے دیم ءَ کیت آ پیریں میجر اِنت۔ پیریں میجر یک اسپیتیں جنگلی ھیکّے کہ آ دگہ گُنگدامانی دل ءُ دماگاں سرکشی ءِ جوش ءُ جزبگ ءَ ودّین اِیت۔ اِے گِدار ءِ تہ ءَ کارل مارکس کہ کمیونیزم ءِ جوڑکنوک اِنت ءُ ولادیمر لینن کہ روس ءِ آشوب ءُ سویت راج ءِ کمیونِسٹ راھشون اِنت پیریں میجر بُندر ءَ ھماھانی کِرد ءُ کُنِشانی پدّرائی ءَ دنت۔ ھمائی ءَ آشوب ءِ راہ ءُ راھبند دیم ءَ آورتگ اَنت۔ اُلُس ءِ دل ءِ تہ ءَ آئی ءِ مزنيں اِزّت ءُ شرپے ھست اِنت۔

دومی کارست نیپولین اِنت آ برکشر ءِ یک جنگلی تُرسناک گْوناپ ءِ ھیکّے۔ آئی ءِ مزنیں شرپے ھست ءُ واکدار ءُ ھاکمی یے لوٹوکے۔ اِے جوسِپ اسٹالِن ءِ چھرگ ءِ جنت۔ گُنگدام واڑ ءِ مستریں کلپ ءُ بدماش نیپولین اِنت۔

اسنوبال نیپولین ءِ بدواہ ءُ جونز ءِ ھاکمی ءِ تاراج کنگ ءَ پد گُنگدام واڑ ءِ ھکّیگیں سروک اِنت۔   آئی ءِ زندمان لیون ٹروٹسکی ءِ چھرگ ءَ جنت ءُ برے برے لینن ءِ کِرد اوں ھوار بیت اِنت۔  

اسکیولر یک کسانیں اسپیتیں پزّوریں ھیکّے۔ نیپولین ءِ دست ءِ چیر ءِ دْراھیں کارانی سروک ءُ رپک ءُ پندل سازگ ءِ وزیر۔ اِے کارست یاچیسلا مالِٹا کہ سویت ءِ راجی راھشونے بیتگ ھمائی ءِ چھرگ ءَ جنت۔

چریشاں ابید دگہ کارستے مینیمس اِنت آ یک شائریں ھیکّے وھدے کہ " انگلستان ءِ زور آوریں رستراں" لچّہ ءِ سر ءَ پابندی جنگ بیت گُنگدام واڑ ءِ دومی ءُ سیمی راجی لچّھاں ءَ نبشتہ کنت۔

باکسر یک وپاداریں، مھروانیں، سکّیں جھدکاریں ءُ شَرپداریں اپسے۔ سادگ ءُ نادانے۔ گُنگدام واڑ ءِ ھاتر ءَ سکّ جھد ءُ جکانسری کنت۔ آئی ءِ ھمے گْوشگ بیت کہ نیپولین ھر وھد ھکّ ءُ راست اِنت۔ وھدے کہ باکسر ٹپّی بیت گڑا نیپولین آئی ءَ ھندی اسپ ءِ کساب ءِ گْور ءَ بھا کنت دانکہ پہ وت ءَ وِسکی شراب بہ گِپت بہ کنت ءُ اسکیولر ھمے ردیں ھال ءَ شِنگ کنت کہ باکسر بیران بیتگ۔

منی دلدوستیں کارِست باکسر اِنت آئی ءِ دلپھکی، ھیدریچی ءُ وتی گُنگدام واڑ ءِ گُنگدامانی ھزمت کنگ ءِ مزنیں واھگ ءُ جزبگے ھست بلے ھیپ کہ زوراک ءُ زالمانی ارجان بیت۔

مولی یک وتواہ ءُ متلب پرستیں اسپیتیں جوانیں مادیانے۔ آشوب ءَ چہ پد آ تچ اِیت ءُ دیم پہ دگہ واڑے ءَ روت۔

کلور یک سنگین ءُ گراں مھزبیں مادگیں اپسے۔ آئی ءَ باکسر ءِ مزنیں ھیال ءُ پِگرے پِر اِنت کہ آ سکّ باز ھزمت ءُ کار کنت۔ کلور نبشتگیں دْراھیں آباں ونت کنت بلے یکجاہ بزانت ءُ متلب ءَ زانت اِش نہ کنت۔ آ اسکیولر ءُ نیپولین ءِ مکر ءُ پریباں زانت ءُ سرپد بیت۔

بنجمن یک ھرے۔ گُنگدام واڑ ءِ دْرستاں چہ پیرتِریں زانتکار تِریں گُنگدام اِنت۔ آ گُنگدام واڑ ءِ راھبنداں شَرّی سر ءَ ونت کنت۔ گرم دماگے، کمّ گپّ جنت۔

موریل یک پیریں دانائیں پسے۔ آ  گُنگدام واڑ ءِ دْراھیں گُنگدامانی دوزواہ اِنت۔ بِنجمن ءِ پیم ءَ آ اوں ونت کنت اِنت۔

لھتیں ھیکّ جیسی، بلیوبال ءُ پِنچر نامیں گُلّڑاں ۔ ودی بیگ ءَ پد نیپولین بارت اِش وتی گْور ءَ رودین اِیت اِش ءُ وتی سیکیورٹی ءُ ھیالداروک جوڑ اِش کنت۔

موسس یک جنگلی گُراگے۔ آ مسٹر جونز ءِ رامگیں مُرگ اِنت، جاسوسی کنت، مُکبری کنت، ءُ ھال اھوالاں سر کنت۔ ءُ چالاکیں گپّ کنوکے۔

اِے گِدار ءِ تہ ءَ چریشاں ابید گُرانڈ، نکینک، گوک، پِشی ھوار اَنت ءُ دْراھینانی کار ءُ کسب گُنگدام واڑ ءِ گھبودی ءُ دیمروئی ءِ ھاتر ءَ جھد کنگ اِنت۔

 گُنگدام واڑ ءِ انسانیں کارِست ایش اَنت:

مسٹر جونز مینر واڑ ءِ بُندری واھُند اِنت۔ آ یک مزنیں نِشھی ائیں مردمے۔ وھدے کہ مسٹر جونز بے کساس ھنوش ءُ ملار بیت ءُ گُنگداماں الکاپی ءَ کاہ ءُ کدیم نہ کنت ءُ آھاں شَرّی سر ءَ نہ چیٹ اِیت گڑا آ جونز ءِ سر ءَ اُرُش کن اَنت ءُ یاگی جوڑ بنت۔

 مسٹر پریڈرک پِنچ پیلڈ ءِ یک کسانیں بلے پلاگار اِتگیں واڑے ءِ توانائیں مالک اِنت ءُ آ زیت گوں نیپولین ءَ ھمگنگل ءُ ھمگرنچ بیت۔ گُنگدام واڑ ءِ یک نیمگے ءِ زمین گوں پِنچ پیلڈ ءَ ھوار بیت ءُ دومی نیمگ ءَ گوں پاکس ووڈ ءَ ۔ گُنگدام واڑ ءِ تیوگیں جانور چہ پریڈرک ءَ تُرس اَنت پرچا کہ آئی ءِ بابت ءَ ھمے بے بُنیں گپّ مشھور اَت کہ آ گوں کروس مِڑینگ ءَ وت ءَ را وشّنود کنت۔ نیپولین ءُ پریڈرک گوں یک دومی ءَ تِپاک بنت دانکہ نیپولین وتی داراں بھا بہ کنت بلے نیپولین ھما وھد ءَ سکّ جُش اِیت ءُ برانز گِیپت وھدے کہ آ سھیگ بیت کہ پریڈرک ءَ آئی ءَ را نکلی زَرّ داتگ۔ اِے ریپّکاری ءَ پد پریڈرک وتی مردمانی پجّیگ ءَ گُنگدام واڑ ءِ سر ءَ اُرُش کن اَنت ءُ بازیں گُنگدامے کُش اَنت ءُ گْواتی کارجاہ ءَ تباہ ءُ برباد کن اَنت۔

دگہ کارستے مسٹر پِلکنگٹن اِنت آ پاکس ووڈ واڑ ءِ یک سُستیں بلے چالاک ءُ آسودگیں سروکے۔ آ ھمساھگیں مزنیں ڈگارے ءِ واھُند اِنت کہ آئی ءِ تہ ءَ بے کساس سبزگ ءُ کاہ رُستگ۔ پِلکنگٹن چہ پریڈرک ءَ گیشتر سیر ءُ ازگار اِنت ءُ گیشتر زمین ءِ مالک اِنت۔ پِلکنگٹن ھم گُنگدامانی آشوب ءِ بابت ءَ پِگرمند اِنت کہ آھاں جونز ءِ واجھی ھلاس کُت۔ آ پریشان اِنت کہ آئی ءَ گون ءَ ھم چُش بوت کنت۔   

ویمپر اوں یک انسانیں کارستے کہ نیپولین اِے مرد ءَ ھمے ھاتر ءَ کار ءَ دار اِیت دانکہ آ گُنگدام ءُ چاگرد ءِ انسانی میان ءَ سُھل ءُ تْران، گپّ ءُ راھوت بہ کنائین اِیت۔ ایشی ءَ ابید ھما وراک کہ گُنگدام واڑ ءَ دست نہ کپ اَنت انچوش کہ بِسکوٹ ءُ اِے دگہ بُنکی وردن آھانی آرگ ءِ ڈُبّہ ھم ھمے بزّگ ءَ دات اِش۔ نوبت داں اِد ءَ رس اِت آئی ءَ ھیکّانی ھاتر ءَ الکول ءِ آرگ اوں بِنا کُت۔

چی بیت؟ اگاں مئے ءُ شُمئے وتی داشتگیں ایردستیں گُنگدام یک روچے مئے ھلاپ ءَ سَرکشی بہ کن اَنت ءُ مئے زند ھمیشانی ھزمت کنگ ءِ برکت ءَ آسیدگ اِنت اگاں کُکُڑ مارا ھیک مہ دے اَنت، گوک شیر مہ دے اَنت، کائیگر زمین ءِ ننگار کنگ ءَ دست کشّی  بہ کن اَنت میش ءُ گُرانڈ پژم مہ دے اَنت، پس گوشت ءُ شیر دیگ ءَ مکن بہ کن اِنت، ھَر بارکشّی کنگ ءَ ساپ اِنکار بہ کن اَنت ءُ اپس وتی وجھاں سواری ءَ مئیل اَنت ءُ ھما دْراھیں گُنگدام کہ ھماھانی برکت ءَ مئے گُزران بیت زھرشانی بہ کن اَنت، یاگی بہ بنت، نوکیں وَشّ ھالیں زندے ءِ تلبگار بہ بنت گڑا چی بیت؟

نبشتہ کار ءِ اِزمی بودشت لکّ ستا کرز اِیت کہ آَ انچیں جْوانیں وڑے ءَ گِدار ءَ آسر کار اِیت ءُ سرکنت کہ پہ وانوکاں جیڑگانی در بُج اَنت ءُ آ ھیال ءِ نیل بومیں زِر ءَ ایر کپ اِیت بہ اجکّھی ءَ دَرائین اِیت اڑے، چُشیں زید ءُ ندارگ من وَ سما ھم نہ کُتگ آسرال چوش بیت !

اِے گِدار ءِ وانگ ءَ پد منی لیکہ ھمیش اَنت کہ اِے جاورھال تھنا زوراکیں اسٹالین ءِ وھد ءُ باریگ ءِ نہ اَنت نَے کہ بَزّگیں سویت یونین ءِ ایردستیں راج ءِ ئیگ اَنت بلکیں اِے ھرھما مُلک ءُ ڈیھ ءِ نگیگیں جاورانی بابت ءَ اِنت کہ اود ءِ واجہ ءُ سروک وتی چالاکی، مَکّاری ءُ زوراکی ءَ بَزّگیں ءُ سادگیں لسّ مھلوک ءِ دیم ءَ چینک ریچ اَنت ءُ آھاں وتی مُوچکین ءَ دور دے اَنت دانکہ وت ءَ ازگار ءُ آسیدگ بہ کن اَنت ءُ اُلُس ءَ وتی پاد ءِ پازوار۔ بدبھتی ءَ مئے گْور ءَ انگت ءَ انیمل پارم ءِ نوبت ءُ باریگ اِنت ءُ جاورھال ھما پیم ءَ اَنت کہ واجہ، میر ءُ موتبر پاور ءُ واجھی لوٹ اَنت مِسل ء نیپولین ءَ زوراک ءُ تمرد اَنت۔ مئے رسانکدر ءُ واجھانی کاسگ چَٹّ ءُ چانیگ وار چو اسکیولر ءَ سادگیں اُلُس ءُ مردماں سُرین اَنت ءُ آھانی زھناں ھراب کن اَنت ءُ مردم پہ کوری ءَ ھمیشانی رندگیری ءَ کن اَنت ءُ ایشاناں سر ءِ بان ءَ نادین اَنت۔ مورمانٹ ءُ دروگ بندیں راھشون ءُ سروک رُژنائیں باندات ءُ وَشّ ءُ آسودگیں زندے ءِ لبّ ءُ لالچ ءَ دے اَنت، آھانی گْور ءَ اووٹ پِنڈ اَنت ءُ مھلوک ءَ رَد دے اَنت۔ نیزگار روچ پہ روچ بَزّگ ءُ نیزگار ءُ ازگار روچ پہ روچ پَزّور ءُ ازگار بنت۔ آ تھنا وتی لاپ ءِ والینگ ءُ وتی زند ءِ وژھال کنگ ءِ نیمّون ءَ ھزاراں لسّ مھلوکانی زند، وَشّی، کار ءُ روزگار ءِ کول ءُ مُسام ءَ دیگ ءِ دروگیں گپٓ ءَ کن اَنت بلے یک رندے کہ واجھی ایشاں رَس اِت گڑا توری مردم بہ مر اَنت ایشاں درد ءُ مرَگ نہ بیت۔

وَشّی ءِ ھبر ایش اِنت کہ انیمل پارم گِدار نی شمارا بلوچی زبان ءَ اوں وانگ ءَ دست کپت کنت۔اِے گِدار واجہ سدیک سلاہ ءَ جْوانی ءَ بلوچی ءَ رجانک کُتگ ءُ ایشی ءِ بلوچی نام گُنگدام واڑ ایرکُتگ ئِے ءُ پازل ادبی کاروان مند ءِ نیمگ ءَ چھاپ ءُ شِنگ بیتگ۔ اِے پہ وانوکاں یک میان استمانی مزن ناميں نبشتہ کارے ءِ گِدار ءِ وانگ ءُ سرپد بیگ ءِ شَرّیں موکھے۔ باید اِنت چرے گْواچی ءَ گیش ءَ چہ گیش سیتّ ءُ نپّ چِست بہ کن اِیں۔

گُڈّسر ءَ من ھر یک وانوکے ءَ اِے گِدار ءِ وانگ ءِ ھُبّ ءُ سکین ءَ دے آں ھاس کن ھما وانوکاں کہ آ زانگ لوٹ اَنت پھک ءُ پولِنگیں راجکاری چی یے،  ھما کہ گوچل ءُ کلپیں راھشونانی سُر ءُ پُر ءُ رپک ءُ ھُنراں زانگ لوٹ اَنت، ایردستیں لسّ مھلوک ءِ باندات چون بیت، کَے اِنت یار؟  کَے اِنت گدّار؟ تاکت ءُ سروکی ءِ ھَڑکہّ چتور مردم ءَ تاوان بار کنت ءُ دْرستاں گیش اِے گپّ کہ باريں لسّ مھلوک ءِ دیستگيں نیکیں واب کدی سبز اَنت، شاہ ءُ ناڑ جَن اَنت ءُ وَشّھالی ءِ بام  کدی ٹِکّ دنت؟