کِسّہ: دانکہ سر ءَ نہ لگّ اِیت نہ زانت اِنت کسّ !

  

رجانکار: اُزیر مھرؔ

 

یک بادشاھے ایرانی گُلامے ءِ ھمراہ یدّار ءَ سوار اَت۔ گُلام ءَ اِے سپر ءَ پیسر ھجبر دریا نہ دیستگ اَت ءُ آئی ءَ دریا ءِ واری ءُ تگلیپی ءِ بابت ءَ نہ زانتگ بیتگ پمیشکا آئی ءَ گریوگ ءُ کوکّار کنگ بندات کُت ءُ آئی ءِ جسم دْرھگ ءَ لگّ اِت۔ یدّار ءِ مردم گوں آئی ءَ نرمی ءُ مھروانی ءَ پیش آتک اَنت ءُ سرپد اِش کُت بلے آ دلجم ءُ ساکم نہ بوت۔ ھمے سوب ءَ بادشاہ ءِ وشّی ءُ ایمنی ھم ھاکاں ھوار بوت۔ ھِچّ راہ ءُ درے نیست اَت نَے کہ شَرّیں رِپک ءُ ھُنرے ءِ سوَڑگ  ءُ ھیالے آتک۔ یک دانائیں مردے ھمے یدّار ءَ سوار اَت۔ آئی ءَ بادشاہ ءَ را گْوشت کہ واجہ اگاں تو ھُکم بہ دئے یک وڑے ءَ من ایشی ءَ ھاموش کُت کن آں۔ بادشاہ ءَ دَرّائینت اِے وَ تئی مزنیں مھروانی یے بیت کہ اگاں تو چوش بہ کن ئے۔ دانائیں مرد ءَ ھُکم دات کہ گُلام دریا ءَ دور دیگ بہ بیت۔ آ یکپاریگی آپ ءَ کپت ءُ لھتيں بُکّ وارت ئِے پد ءَ آئی ءِ مید گِرگ بوت اَنت ءُ یدّار ءِ نیمگ ءَ آرگ بوت گڑا آ یدّار ءِ دیمّ ءِ نیمگ ءَ (پُشتی نیمگ ءَ) گوں دوئیں دستاں دْرنجلوک بوت۔ وھدے کہ بُرز ءَ آتک گڑا یدّار ءِ یک کُنجے ءَ نِشت ءُ ایمن بوت۔ بادشاہ سکّ باز اجکّہ بوت ءُ جست ئِے کُت کہ اِے کار ءِ تہ ءَ چی دانائی ھست اَت؟ دانائیں مرد ءَ گْوشت کہ پیسر ءَ ایشی ءَ بُڈّگ ءِ تگلیپ چِست نہ کُتگ اَت نَے کہ یدّار ءِ سلامتی ءِ کدر ئِے زانتگ اَت۔ ھمے پیم ءَ سلامتی ءِ کدر ءُ ارزشت ءَ ھما مردم زانت اِنت کہ آ یک جنجال ءُ گپچلے ءِ آماچ بہ بیت۔ 

:سرشون 

کِسّہ ءِ نام: حکمت و دانائی

72 تاکدیم:

The Aspirations Magazine 2014-2016 کتاب ءِ نام: