کِسّہ چی یے؟

 

 

نبشتہ کار: مزھرالاسلام

رجانکار: اُزیر مھر

 

گْوشت ئِے

کِسّہ چی یے؟

گْوشتوں

کِسّہ اولی رند ءَ میڑہ چارگ ءَ آتکگیں کَلّگی جنک اِنت

کِسّہ پِگر ءَ ایربُکّ اِتگیں  چمّ اِنت

کِسّہ کمےّ وھد پیسر گریتگیں جنین اِنت

کِسّہ گپّانی جنگل اِنت

آئی ءَ گْوشت ناں من ءَ گیشتر بہ گْوش

من گْوشت

کِسّہ مزنیں بال ءَ درآتکگیں ھما مُرگ اِنت کہ آئی ءِ

بانزل ھجبر دم نہ بر اَنت ءُ کِسّہ کار ھما چتَر اِنت

کہ آزمان ءِ نیمگ ءَ دیم ئِے چست کُتگ ءُ اوشتاتگ

کہ کدی مُرگ(کِسّہ) چتَر ءِ سر ءَ ایر بئیت

اِے مُرگ ناپُھتھیں ءُ پُھتھیں دوئیں آبادیانی سر ءَ بال کنت

ایشی ءِ بال برے سک باز جَھل ءُ برے سکّ باز بُرز بیت اِنت

آئی ءَ درّائینت کہ من  گیشتر بہ گْوش

من درّائینت

کِسّہ بانور ءِ آروسی پوشاک اِنت

کِسّہ بتی جتگیں چوک اِنت

کِسّہ پیریں پکیر اِنت

کِسّہ کارِستانی مات اِنت

کِسّہ بیمّاریں اھد ءِ گواھی اِنت

کِسّہ یک دامے

کِسّہ چاہ ءِ تہ ءَ کپتگیں مکسک اِنت

کِسّہ اسپ گاڑی ءِ دیم ءَ بستگیں اسپ اِنت

کِسّہ دِیگر ءِ وھد ءَ چہ ڈگار ءَ آیوکیں ژند ءُ ژولیں مردم ءِ

پاد ءَ بستگيں ژندی اِنت

وتکُشی کنوکیں مردم ءِ راز اِنت

کِسّہ ءَ پیژگاہ لیب کنوکیں زھگ اِنت

کِسّہ یک گنوکے ءِ تارتاریں پوشاک اِنت

گْوشت ئِے من ءَ گیشتر بہ گْوش

گْوشتوں

کِسّہ زھریں دِلبر اِنت

کِسّہ تُنّیگیں جِنگ اِنت

کِسّہ یک پیرزالیں اداکارے

گْوشت ئِے من ءَ گیشتر بہ گْوش

من گْوشت

کِسّہ منٹو اِنت

کِسّہ چیکوپ اِنت

کِسّہ کاپکا اِنت

کِسّہ بید ء ٹکٹ ءَ سپرکنوکیں مساپر اِنت

کِسّہ مھر ءِ گپّ اِنت

کِسّہ درد ءُ رنج ءِ شپ اِنت

آ مونجا بوت ءُ درّائینت ئِے

من ءَ گیشتر بہ گْوش

من گْوشت

کِسّہ سیاھیں دَور ءِ واھی اِنت

کِسّہ واھشت ءِ گُلابیں مولُمانی پُلّ اِنت

کِسّہ ورنائی ءِ سیمّسراں سربیتگیں جنک ءِ واب اِنت

کِسّہ دِرّتگیں مردم اِنت

کِسّہ تاک تاک ءِ سر ءَ جنک اِنت

کِسّہ اُمرکید ءِ سزاواریں بندیگ اِنت

کِسّہ چہ رَم ءَ سَرسِستگیں کونج اِنت

کِسّہ چھاپ نہ بیتگیں بوسگ اِنت

کِسّہ گْونڈو ءِ سلیٹ ءِ سر ءِ کرُتگیں جُست اِنت

کِسّہ تاھیر ءِ ھما گپّ اِنت

کہ شورش ملک ءَ من ءَ گْوشتگ

کِسّہ ھما مَند (اَنا) اِنت 

کہ منی مات رشیدہ بیگم ءُ منی پِت

مھمد شپیی ءَ من ءَ میراس ءَ داتگ

کِسّہ ھما ھمراہ اِنت کہ من ءَ

ممتاز شاھین ءِ دْروشم ءَ رس اِتگ

کِسّہ ھما سپر اِنت کہ

آئی ءِ گْرانیں تک ءُ پِڑانی بابت ءَ من ءَ ممتاز مپتی ءَ سُھل ءُ تْران کنگ ھیل داتگ۔

آئی ءِ چم ارسیگ بوت اَنت ءُ

آ گیشتر ملور بوت ءُ درّائینت ئِے ۔۔۔۔ من ءَ انگت گیشتر بہ گْوش

من گْوشت

کِسّہ توئے

کِسّہ من آں

 

سَرشون:

کہانی کیا ہے

کتاب: گھوڑوں کے شہر میں اکیلا آدمی

 :تاکدیم

۱۱۔۱۴