آزمانک: نیزگاریں اِستان ءِ بُزرگ

  

 

نبشتہ کار : سیّد اسد الی

بلوچی رجانکار: اُزیر مھرؔ

 

آ سِنگ ءِ جوڑبیتگیں یک لسّ بانے اَت ءُ اِے پیمیں بان وَ اِے کوہ ءِ نِگْور دیم ءَ تاں باز دور ءَ تالان اِت اَنت۔ بان ءِ دیم ءَ ھم لسونیں زمین ءِ کسان کسانیں بھر اِت اَنت کہ آھانی تہ ءَ بٹاٹہ، مٹر ءُ دگہ سبزی کِشگ بیتگ اِت اَنت۔ بان ءِ پلّو ءَ یک واڑے اَت آئی ءِ تہ ءَ درزنے ءِ کِساس ءَ پس اِت اَنت کہ ھر سھب ءَ آئی ءِ برات ءَ کوہ ءِ سر ءَ بُرت اَنت۔ بان ءِ دار ءِ جوڑ بیتگیں چھتے اَت ءُ چہ یک کُنجے ءَ دیت یک لکیرے ءِ شکل ءَ دراتک اَنت۔ پمیشکا اِے ھر ھساب ءَ یک لسّ بانے اَت۔ وھدے کہ روچ انچو بُرز بوت کہ دیم ءِ بُرزیں کوہ ھم آئی ءِ نوان کنگ ءَ بے سوب بیگ ءَ اَت تاں یک بچکے آ بان ءِ چانٹ ءِ سر ءَ اتک ءُ اوشتات۔ آ اِے ھند ءِ دگہ بچکانی وڑ ءَ وَشّ رنگ ءُ زْرنگیں جسمے ءِ واھند اَت۔ آئی ءِ کوپگ ءِ سر ءَ یک نوکیں تپرے مانجتگ اَت ءُ دیم ءِ سر ءَ مزنیں دلپروشی یے مانشانتگ اَت۔

 

چہ اِے لوگ ءَ دو کوھی راہ دراتک اَنت۔ دوئیں راہ یک پیم ءَ بے لسون ءُ پیچ ءُ تاب اِت اَنت بلے دوئینانی تہ ءَ باز دگری ھست اَت۔ یک راھے شھر ءِ نیمگ ءَ روگ ءَ اَت۔۔۔۔ شھر کہ آئی ءِ تہ ءَ دربرجاہ اَت، دوست اِت اَنت، کبابانی وشّبو ءَ آتاریں بازار اِت اَنت۔ ھما راہ کہ آئی ءِ سر ءَ آ داں روچ ء مرچی روگ ءَ اَت۔ ھما راہ کہ نی آئی ءِ چمّانی تہ ءَ انچوش نکش بیتگ اَت کہ آئی ءَ وتی چمّ بند کُتین اَنت پد ءَ ھم شھر ءَ سر بیتگ اَت۔

 

ءُ دومی راہ۔۔۔ آ دیم پہ کوھانی شاھیگانی ءُ دراجی ءَ شُت۔ کوہ ءِ پراھیں پھنات کہ اود ءَ تھنائی اَت، دْرچک اِت اَنت، کور اَت، پَس اِت اَنت۔ آئی ءَ مدام جیڑ اِت کہ آ بِھ اِے راہ ءَ نہ روت۔ نہ زان آن باریں پرچا آئی ءَ چو جیڑ اِت؟ آکِر آئی ءِ پِت، برات، دْراھیں سیاد چمے راہ ءَ گْوستگ اِت اَنت۔ ھمے راہ ءَ آئی ءِ پیرُک پاد ءِ شِترگ ءِ سبب ءَ جھل ءَ ژِیمب ءَ کپت، ھمے راہ ءَ آئی ءِ پِت ءَ گوں آئی ءِ مات ءَ اولی رند ءَ ڈیکّ وارت۔۔۔۔ ھمے راہ ءَ آئی ءِ سیادی، ھون، دود ءُ ربیدگ ءُ مھر پیوست اِت اَنت۔ چرے چیزّ ءَ پرچا تچگ؟ بلے آ جتائیں مردمے اَت۔ آئی ءَ وانگ ءُ زانگ لوٹ اِت ءُ چرے بے نپیں بُرزیاں باز دور روگ ئِے لوٹ اِت۔ یک انچیں دنیایے ءَ کہ تچک ءُ بروبر اِنت۔ اود ءَ تھنا روگ ءِ ھاتر ءَ چہ انسانی واک ءَ مستریں زور ءُ ھاٹیگے پکار مہ بیت۔ کسانیں لوگے بہ بیت کہ آئی ءَ زمستان ءِ ششیں ماھاں برپ مہ پیڑا اِیت۔  ھمود ءَ کہ زند پہ تاھیر جنزان بہ کنت ءُ اِد ءَ ۔۔۔ اِد ءَ وَ کور ھم بَد اَنت۔

 

بلے اِے ھما وھد ءِ گپّ اِنت کہ آئی ءَ واب دیست کُت کُتگ۔ کور ءِ کش ءَ سِک ءِ شوکیں سِنگاں گوں مزن مزنیں بادگیر بست کُت کُتگ اَت۔ بلے نی آئی ءِ گْور ءَ وَ یک تپرے اَت ءُ دیگر ءِ وھد ءَ آئی ءَ بَڈّے دار ءِ پجّیگ ءَ لوگ ءَ آھگی اَت۔ پد ءَ گوں چُشیں ژند ءُ ژولیں جسم ءَ کسے چتور واب دیست کُت کنت؟ آئی ءَ زانتگ اَت کہ آ اگاں مرچی اِے راہ ءَ بہ روت پد ءَ ھچبر واتر نہ بیت۔ راولپنڈی ءِ کسانیں میتگے ءِ کواٹر، یک کارگِسے ءِ تہ ءَ ایمنیں کار۔۔۔ اِے دْراہ ھشکیں واب بنت۔ آئی ءَ اِے دْراھیں گپّ زانتگ اِت اَنت بلے زانگ ءِ متلب اِے وَ نہ اِنت کہ تو واکدار ھم بہ بئے۔ آئی ءَ وتی پِت ءِ گالوار ءِ گُرّگ یات اَت، مات ءِ نادْراھیں دیم ءِ سُھری آئی ءِ چمّانی دیم ءَ پِر ترّوکی ورگ ءَ اَت۔ اِے پیمیں جاورھالاں آئی ءَ چتور انکار کُت کُتگ اَت؟

 

کار کنگ ءَ پد زُھر بوت۔ آئی ءِ جسم نی دمبرتگ اَت بلے اِے اولی روچ ءَ آئی ءَ باز کار کنگ لوٹ اِت۔ گْوشئے زاناں آئی ءِ تہ ءِ جِنّی زورے اتکگ ءُ آ گوں دوئیں دستاں تپر جنگ ءَ اَت پردگیں تیوگیں جنگل ءِ داراں مہ گُڈّ اِیت۔ اگاں جنگل مہ بیت گڑا باندا روچ آئی ءَ اِد ءَ آھگ ءِ زرورت نہ کپ اِیت۔ بلے ابرم چہ مئے انسانانی واھشت ءُ مھکمیں ارادھاں سنگدلی ءَ بے پرواہ اِنت۔ آ سُھبیگینیں یکشل ءَ تپر جنگ ءَ اَت ءُ جنگل انگت ھم ھما پیم اوشتاتگ ءُ برجاہ اَت۔ چہ آئی ءِ دستاں نی وَ ھون ھم پیژّارگ ءَ اَت بلے آ نہ اوشتات یکشل ءَ تپر جنگ ءَ اَت۔ پد ءَ یک زورداریں دستگے ءِ جنگ ءَ گوں تپر چہ آئی ءِ دست ءَ دراتک ءُ جھل ءَ تچوک ءُ تُرندیں کور ءَ کپت۔

 

آئی ءَ ھِژم زُرت۔ اِے نوکیں تپرے اَت۔ آئی ءَ نہ زانتگ اَت کہ آ یک نوکیں تپرے بھا ءَ زُرت کُت کن اَنت ھم یا نا؟ ءُ پد ءَ اولی روچ ءَ بیوکیں اِے ویل ءَ کئی سر سرکِچ وارت؟ ھرکس ایشی ءَ چہ کار ءَ رکّگ ءُ جھگ ءِ یک نیمّونے لیک اِیت۔ لھتیں مردم پہ زھر ءُ لھتیں مردم پہ بزّگی آئی ءِ سر ءَ دنتان دْرُش اَنت۔ آ ھمود ءَ کور ءِ کِرّ ءَ اوشتاتگ ءُ گریوگ ءَ اَت۔ ھمے ساھت ءَ دربرجاہ ءَ ونتگیں دارپروش ءِ کِسّہ آئی ءِ زھن ءِ تہ ءَ گردش کنگ ءَ لگّ اِت۔

 

کَے بزانت، بگندئے اِے کور ءِ واجہ منی کُمک ءُ مدت کنگ ءَ دربئیت؟ کَے بزانت کِسّہ راست بیت کُت کن اَنت؟ آ گریوگ ءَ اَت ءُ نیم چمّی کور ءِ نیمگ ءَ اوں چارگ ءَ اَت۔  

 

ھمے دمان ءَ آپ ءِ سر ءَ گِجّ سھرا بوت ءُ گَردوئیں چِرّک ءُ گنجی پراک پوش اِتگیں یک نزوریں مردینے پدّر بوت۔ آئی ءِ مید شِنگ ءُ شانگ اِت اَنت، ریش مزن اِت اَنت، ءُ چمّانی سر ءَ ٹوھيں کانچ ءِ چشمکے اَت۔ آ گریوگ ءُ نالگ ءَ بے ھیال بوت ءُ بھمانگی ءَ آئی ءَ چارگ ءَ لگّ اِت۔ آ المّ ءَ یک انسانے نہ اَت اگاں نہ اِے ٹَنٹیں ءُ تْرندیں کور ءِ تہ ءَ چتور اوشتاتگ اَت؟

 

 

پرچا وتسر ءَ گریوگ ءَ اِت ئے؟ تو منی واب ھراب کُتگ۔ آئی ءَ بارگیں توار ءُ کمّے پھریگیں گالوارے ءَ درّائینت۔

 

تو کَے ئے؟ بچک ءَ پُرس اِت۔

پوچیں جُستے۔۔۔ تو وَ زان ئے کہ من اِے پیریں کور ءِ واجہ آں۔ گندگ ءَ تئی اوں چیزے گار بیتگ؟ آئی ءَ گْوشت ءُ اِے پیم گْوشگ ءَ گوں آئی ءِ چمّانی تہ ءَ اجبیں جلشکے اتک۔

 

ھو، یک تپرے۔۔ پھک ءَ نوک اِنت۔۔۔۔ اِد ءَ کپتگ۔ آئی ءَ آپ ءِ نیمگ ءَ اشارہ کُت ءُ گْوشت،، اراں تو آئی ءَ کَشّ اِت کُت کن ئے؟

 

جھد کن آں بلے شُما مرچاں باز لاپرواہ بیگ ءَ اِت۔

من وادہ کن آں کہ دگہ برے بِھ چُش نہ بیت۔۔۔ ھو من وادہ کن آں۔۔ آ کوکّار کنان اَت بلے پیرمرد آپ ءِ تہ ءَ شُتگ اَت۔

 

اجبیں واجھے اَت بلے یک نیزگاریں استانے ءِ کسانیں کورے ءِ واجہ دگہ چتور بوت کنت؟

بلے ھدا بکنت آ تھنا تِلاہ ءِ تپرے بیار اِیت۔۔۔ پد ءَ من ءَ ھچبر جنگل ءَ آھگ ءِ زرورت نہ کپ اِیت۔ بس واجھیں مردمانی وڑ ءَ برے برے موسمے ءَ ترّگ ءَ کایاں ءُ اِد ءِ دْراھیں بچک ءُ چوریگ منی پشت ءُ دیم ءَ چکر اَنت۔ آ جیڑگ ءَ اَت کہ آپ ءِ سر ءَ گِجّ چست بوت۔

 

ھما لاگریں مرد ءَ چیزے دست ءَ اَت ءُ ڈنّ ءَ دراتک۔ آ چیز ھِچّ وڑ ءَ تپر نہ اَت۔ بُزرگ ءَ چشمک ءِ کانچ ساپ کُت ءُ آ روک روک ءَ چار اِت ءُ اِے رندی بُرزیں توارے ءَ گْوشت ئِے،

 

اڑے کم بھت اِے وَ کپیسّے دراتکگ۔ چی بہ کن آں آپ کہ انچو لُڑ اِنت ءُ پد ءَ چمّانی پیسرگیں روک ھم کُجا پشت کپتگ۔۔۔ بلے من پد ءَ رو آں۔

 

آئی ءِ وابانی بادگیر تُش تُش بیتگ اَت بلے آئی ءَ انگت ھم نُگرہ ءِ تپرے ءِ امیت ھست اَت۔ اِے رندی ایوک ءَ یک کوشی تاھے دراتک۔ ءُ آئی ءَ اِے دْراھیں چیز یلہ داتگ اِت اَنت ءُ وتی تپر ءِ بابت ءَ جیڑگ ءَ اَت۔

 

نی من بِھ ناشُکری نہ کن آں۔ سجّھیں روچ ءَ دار پْروش آں ءُ شپ ءَ ڈیوا ءِ رُژنائی ءِ دیم ءَ نند آں وان آں۔ ۔۔۔۔ اَے ھدا من ءَ بس دگہ یک موھے بہ دئے۔ دُوا لوٹگ ءِ وھد ءَ آئی ءِ ارس دراتک اَنت۔ اِے سھت ءَ کور ءِ واجہ پد ءَ درا بوت۔ آئی ءَ تپر ءِ دستگ بچک ءِ دست ءَ دات۔ تپر ءِ آسن بگندئے تہ ءَ جاھے ءَ کپتگ اَت۔

 

من چریشی ءَ ابید دگہ ھِچّ درگیتک نہ کُت۔ نی من دم برتگ آں پمیشکا آرام کنگ ءَ رو آں۔ مھربانی بہ کن نی اگاں گریوگی بیت گڑا دگہ جاھے ءَ برو بہ گْریہ۔ کور ءِ واجہ ءَ اِے گپّانی گْوشگ ءَ گوں بُکّے وارت ءُ آئی ءَ تپر ءِ دستگ زُرت ءُ ھاموشی ءَ دیم پہ لوگ ءَ رھادگ بوت۔

 

اِے ھما بیگاہ ءِ گپّ اِنت وھدے کہ آ واجہ ھکیم ءِ گْور ءَ زِھم ءُ ٹپّانی ھاتر ءَ ملَم ءِ گِرگ ءَ دراتک۔ آئی ءَ کْوھنیں چادر ءِ تہ ءَ مانپوش اِتگیں یک مردمے شکّی ئیں وڑے ءَ بازار ءَ روگ ءَ دیست۔ اِے گپّ ءِ درگیجگ ءُ شوھازگ ءِ مجبوری ءَ بچک آئی ءِ پُشت ءَ روان اَت۔ آ مرد کباڑی ءِ دکانے ءَ شُت ءُ اوشتات ءُ اینگُر ءُ آنگر چارگ ءَ پد چہ وتی چادر ءَ چیزے ءِ کَشّگ ءَ لگّ اِت۔ ھمے ساھت ءَ آئی ءِ نگاہ آ بچک ءِ سر ءَ کپت اَنت تاں آ ھِژم بوت۔ آئی ءَ زیت وتی دست چہ چادر ءَ واتر کشّ اِت ءُ چہ اود ءَ رپت۔ بچک تتک ءُ آئی ءِ نزّیک ءَ شُت ءُ آئی ءِ چادر ژپ اِت ئِے۔ بچک ءِ دیم ءَ چِرّک ءُ گنجی پراک پوش اِتگیں یک نزور ءُ لاگریں مردے اوشتاتگ اَت کہ آئی ءِ بگل ءِ چیر ءَ تپر ءِ آسن آئی ءَ ساپ گِندگ ءَ آھگ ءَ اَت۔ یک نیزگاریں اِستانے ءِ لنگڑیں بُزرگے ءِ اسپیت پوشی ءِ راز پاشک بیتگ اَت۔

 

 

سرشون:

کتاب ءِ نام: شہرِ حقیقت میں کہانی لکھنا

نبشتہ کار: سیّد اسد الی

تاکدیم: ۱۴۵۔ ۱۴۸