لَچّہ: اَچ وت ءَ ڈنّ ءَ درا کمّے

 

 

لچّہ کار: نئیم دلپل

رجانکار: اُزیر مھرؔ

 

 اَچ وت ءَ ڈنّ ءَ درا کمّے

 دنیا ءَ بِچار

 اَچ وت ءَ ڈنّ ءَ دربیا اِیں چی گِند اِیں ما؟

ما کہ وتی تہ ءَ ھوار کپتگ اِیں انچو

بس وتی جند ءِ اکس اِنت مئے دیم ءَ

چینچو مٹاتگ اَنت ما لوٹوک

 

کمّے بِچار

کمّے بہ جیڑ تو

 

چینچو وَشّ اَنت اِے گواتانی الوت

چینچو دلکشّ اَنت مُچّیانی بے بْرمشی

اَچ وتی سورت ءَ نِگاھاں دیر کن تو بِچار

چہ وتی جند ءَ گیشتر بْراھدار بہ ئے تو

کمّے پِگرانی تہ ءَ دْروشمے پلگار ءُ بِچار

وتسر ءَ وت زیبائی ءِ جھان ءَ ھوار کپ ئے

 

چہ وتی چوتاریں تبانی آشنائی ءَ

رُژنا بہ کن ارواہ ءِ دْراھیں ڈیواھاں

وتی واباناں گوناپے بہ دئے ءُ

اِے زمانگ ءِ ربیتاں دل ءَ نکش بہ کن

 

 

برے چہ واھگ ءَ درا اِشک ءِ تہ ءَ گوامیل بہ دئے

برے چہ بے برمشی ءَ درا ءُ جاک ءُ سلواتاں ھوار بہ کپ

برے تھنائی ءِ پلّو ءَ بہ دار ءُ زندگی بہ کن

برے آزمان ءُ برے زمین ءَ دست بہ جن

برے وتی مارشتاں راسبندی ءِ ھوناں بہ شود

 

 اَچ وت ءَ ڈنّ ءَ درا کمّے

 دنیا ءَ بِچار