پیاپیں ٹَوک ( دوازدھمی بھر)

 

 

رجانکار: اُزیر مھرؔ

 

 ۱۔ ماڑی ءِ راستی گوں چھت ءُ دیوالاں ھمگرنچ نہ اِنت بلکیں گوں آئی ءِ تہ ءِ ھما جاہ ءَ گوں بندوک اِنت کہ آئی ءِ تہ ءَ مردم نِشت کنت۔

۲۔ مردمانی راھشونی کنگ ءِ ھاتر ءَ آھانی پُشت ءَ برو۔

۳۔ ابرم مردم دلے نہ اِنت۔

۴۔ دلپھکی ءَ بہ مَنّ، سادگی ءَ امباز، وتواھی ءَ کوتاہ کن۔ کمّے واھشت بہ دار۔

۵۔ گوں بے کساس لبّ ءُ لالچ ءَ وشّی ءَ مہ شوھاز ءُ چہ ناوشّی ءُ گم ءَ مہ تُرس۔

۶۔ مھروانی گالانی تہ ءَ بیسہ ءُ توکل ودی کنت۔ مھروانی پگر ءِ تہ ءَ جُھلانکی ودی کنت۔ مھروانی دیگ ءِ تہ ءَ مھر ودی کنت۔

۷۔ ھما مردم کہ دگرانی سر ءَ بیسہ نہ کنت آ ھما مردمانی تہ ءَ ھِچّ بیسہ نہ گند اِیت۔

۸۔ دگرانی زانگ دانائی اِنت وتی زانگ رُژنا ھیالی ءُ آگھی اِنت۔

۹۔ ھما کس کہ دگرانی سر ءَ باج بارت آ مُھمکیں مردمے؛ ھما مردم کہ وتی سر ءَ باج بارت آ زورآوریں مردمے۔

۱۰۔ ھما زانتکار کہ آسیدگی ءِ مھر ءَ دوست دار اِیت آ مردم ءَ یک زاتکارے لیکگ شَرّ نہ اِنت۔

۱۱۔ بے سوبی سوبمندی ءِ بُنپد اِنت ءُ سوبمندی ءِ رسگ ءِ سبب اِنت۔

۱۲۔ مھر چہ دْرستیں جزبگاں مھکم تِر اِنت پرچا کہ اِے یکّیں وھد ءَ مجگ، دل ءُ دْراھیں ھوش ءُ سماھانی سر ءَ اُرُش کنت۔

۱۳۔ کسے ءِ مھر ءِ تہ ءَ جُھلانکی ءَ ھمگرنچ بیگ ترا تاکت دنت ءُ کسے ءَ جُھلانکی ءَ مھر کنگ ترا ھمّت دنت۔

۱۴۔ آسانیں کار ءِ گیشینگ ءَ گوں گرانیں کار ءِ ھاتر ءَ پیسر امیت بہ دار ءُ ساجو بہ ئے۔

۱۵۔ تو اگاں وتی کِشک ءِ راہ ءُ نیمگ ءَ بدل نہ کن ئے تو بگندئے ھمود ءَ روگ ءَ ئے آئی ءَ یل بہ دئے۔

۱۶۔ کسے تچکوک ءُ رِچوکیں آپ ءِ تہ ءَ وتی اکس ءَ دیست کُت نہ کنت۔ تھنا ھما مردم کہ زان اَنت باتنی ایمنی چی یے آ دگراں دات ئِے کُت کن اَنت۔

۱۷۔ تئی جسم ءِ اندر ءَ تئی پسّو ایر اِنت؛ تو زان ئے کہ تو کَے ئے ءُ تو زان ئے کہ ترا چی لوٹ اِیت۔

۱۸۔ ارواہ ءِ زیمر ءَ جھان اِش کُت کنت۔

۱۹۔ منی گْور ءَ پہ وانینگ ءَ بس سَے چیز ھست: سادگی، سبر، رھم۔ اِے سئیں تئی دْرستاں چہ مستریں گنج ءُ ھزانگ اَنت۔

۲۰۔ مزنیں کِرد گوں کسانیں کاراں جوڑ بنت ۔

۲۱۔ یک ھزار میل ءِ سپر گوں یک گامے ءَ بندات بیت۔

۲۲۔ تو اگاں چیزے زیرئے، باید اِنت پیسر ءَ تو بہ دئے، اِے اکل مندی ءِ بندات اِنت۔

۲۳۔ زِند ءُ مَرگ یکیں اوتاگ اِنت، یکّیں لکیر اِنت کہ چہ جتائیں نیمگاں چارگ بیت۔

۲۴۔ یک شَرّیں مساپرے ءِ گْور ءَ پکّائیں مراسا نیست ءُ رسگ ءِ ارادہ ئِے نہ کُتگ۔

۲۵۔ چہ آپ ءَ نرم ءُ بدل بیوکیں چیز نیست پد ءَ اوں ھچّ چیز ایشی ءَ را داشت کُت نہ کنت۔

۲۶۔ ھما مردم کہ گیشتر گپّ کنت آ زیتّ دم بارت۔

 

 

لاؤزے

 

 

 

۲۷۔ بُتکشّی یک شائری یے پرچا کہ اِے چہ مارگ ءَ گیش چارگ بیت ءُ شائری یک بُتکشّی یے پرچا کہ اِے چہ چارگ ءَ گیش مارگ بیت۔

۲۸۔ یک رندے کہ تو بال کنگ ءِ تام چَش اِت تو مدام زمین ءِ سر ءَ کہ گَردئے تئی چمّ آزمان ءِ نیمگ ءَ بنت پرچا کہ تو اود ءَ بیتگ ئے ءُ مدام ھمود ءَ واتر روگ ءِ واھشت دارئے۔

۲۹۔ بید ء واھشت ءُ ھُبّ ءَ وانگ مجگ ءِ یاداشت ءَ ھراب کنت ءُ ھرچیزے کہ یات کنگ بیت مجگ ھچّ چیز ءَ برجاہ داشت نہ کنت۔

۳۰۔ جھان بُتکشّ ءِ مجگ ءُ  دستانی تہ ءَ اِنت۔

۳۱۔ مستریں پریب کہ مردم آئی ءِ آماچ بنت آ مردمانی جند ءِ ھیال ءُ لیکہ اَنت۔

۳۲۔ دْرستاں چہ آریپیں وشّی پھمگ ءِ وشّی اِنت۔

۳۳۔ ھِچّ چیز مھر یا نپرت کنگ نہ بیت داں وھدے کہ پیسر ءَ آ سرپد بیگ مہ بیت۔

۳۴۔ اِے گپّ دیر اِنت منی اِنان ءَ اتکگ کہ سوبمندیں مردم وت باز کم نِشتگ اَنت ءُ چیز بیگ ءَ یلہ اِش داتگ اَنت۔ آ ڈن ءَ دراتکگ اَنت ءُ گوں چیزاں گیروشگ بیتگ اَنت۔ 

۳۵۔ اِزم ھجبر ھلاس کنگ نہ بیت تھنا یلہ دیگ بیت۔

۳۶۔ انچوش کہ یک شَرّ گوازینتگیں روچے وشّیں وابے کار اِیت ھمے پیم ءَ یک شَرّ گوازینتگیں زندے وَشّیں مَرگے کار اِیت۔

۳۷۔ زانتکاری جزبگ ھَوس ءَ کَشّ اِیت۔

۳۸۔ دْراھیں چیزانی اِلم ءُ زانت بیت کنت۔

۳۹۔ ھما مردم کہ کمّ جیڑ اِیت آ گیشتر ردی کنت۔

۴۰۔ من ءَ آ مردم دوست بنت کہ جیڑہ ءُ جنجالانی تہ ءَ ھم بچکند اِت کُت کن اَنت۔

۴۱۔ ھُداوند پوریاگِری ءِ نھاد ءَ مئے گْور ءَ ھرچیز بھا کنت۔

۴۲۔ دربرگ ھجبر مجگ ءَ دم نہ برائین اِیت۔

۴۳۔ دْراھیں سائنس بے کار اَنت ءُ ردی ءَ چکار اَنت اگاں آ چہ کُتہ کاری ءَ ودی نہ بیتگ اَنت کہ دْراھیں اِلم ءُ زانت ءِ مات اِنت۔

۴۴۔ ھما مردم کہ بازیں چیزانی واھند اِنت آ الّم چیزانی روگ ءِ بابت ءَ سکّ تُرسگ ءَ اِنت۔  

 

 

لیونارڈو دا وِنچی

 

 

۴۵۔ زند ءِ مستریں اِزم مارشت اِنت ایشی ءِ مارگ ءِ سبب ءَ ما وجود دار اِیں، درد ءُ تورشت ءِ تہ ءَ ھم۔ 

۴۶۔ گوست باندات ءِ شَرّتریں ربّال اِنت۔

۴۷۔ واری ءُ جنجال راستی ءِ اولی راہ انت۔

۴۸۔ دائم بہ کند اگاں تو کُت کن ئے ۔ اِے ارزانیں درمان اِنت۔

۴۹۔ من نی آ مردم نہ آں کہ پیش ءَ بیتگ آں۔

۵۰۔ مَرگ پہ نام بنّام اِنت کہ مردماں گریوائین اِیت بلے زند ءِ مستریں وھدے واب ءَ گوازینگ بیت۔

 

 

لارڈ بائرن

 

۵۱۔ اِے بار ءِ بوج نہ اِنت کہ ترا پْروش اِیت بلکیں بار ءِ چِست کنگ ءِ داب اِنت کہ ترا چکپروش کنت۔

۵۲۔ تو بِھ چہ کسے ءَ داں ھما وھد ءَ دیمتر ءَ شُت نہ کن ئے داں وھدے کہ تو ھمائی ءِ بروبری ءِ رسگ ءِ جھد کن ئے۔

۵۳۔ تو ھجبر اینچو شَرّ نہ ئے کہ ھرکس ترا گْوش اِیت وھدے کہ تو باج برئے ءُ تو ھجبر اینچو ھراب نہ ئے اینچو کہ مردم گْوش اَنت وھدے کہ تو پروش ورئے۔

۵۴۔ وتی جیڑھاں ھجبر کس ءَ مہ گْوش پرچا کہ بیست درسد مردم کِمار نہ کنت ءُ دگہ ھشتاد درسد مردم گَل اَنت کہ تئی گْور ءَ اِے جیڑہ ھست اَنت۔

۵۵۔ تو اگاں چہ زند ءَ بیزار ئے، تو اگاں ھر سُھب گوں انگریں واھگے ءَ پاد نیائے گڑا تئی گْور ءَ شَرّیں مول ءُ مراد نیست۔

۵۶۔ لائکی ھمیش اِنت کہ تو کجام چیزانی کنگ ءِ بودناک ئے۔ جزبگ ھمے پدّر کنت کہ تو چی کن ئے۔ روِشت ھمے پیش دار اِیت کہ تو چینچو شَرّ ھما کار ءَ کن ئے۔

۵۷۔ زند دہ درسد ھمیش اِنت کہ ھرچی گوں تو بیت ءُ نَود درسد ھمیش اِنت کہ تو گوں ایشی ءَ چون پیش کائے۔

۵۸۔ باجبر ءُ شِکست وروک ودی نہ بنت آ وتی جیڑ اِتگیں ھیال ءِ برورد اَنت۔

۸۹۔ ھجبر چہ دات کُت کنگ ءَ گیش وھدہ مہ کن بلے مدام وھدہ کنگ ءَ گیش بہ دئے۔

 

 

لُو ھوٹس

 

۶۰۔ زیمر چہ دْرستیں دانائی ءُ شھزانتیاں بُرزتریں شُبینگ اِنت۔

۶۱۔ زیمر ارواھی ءُ جسمانی زند ءِ میان ءَ اوشتوک اِنت۔

۶۲۔ اِزم ءَ کَے سرپد بیت؟ کسے کئی گْور ءَ اِے مزنیں دیوی ءِ بابت ءَ سلاہ ءُ شَور زُرت کُت کنت؟

۶۳۔ زیمر مستریں اِلم ءُ زانت ءِ ھما بے جسمیں دروازگ اِنت کہ بنی آدم ءَ پھم اِیت بلے بنی آدم ئِے پھم اِت کُت نہ کنت۔

۶۴۔ یک مزنیں شائرے یک راجے ءِ مستریں زیور اِنت۔

۶۵۔ ھِچّ چیز چہ وتی جند ءِ ردیانی منّگ ءَ گیشتر لائک ء سَگّگ نہ اِنت۔

۶۶۔ تھنا وتی اِزم ءِ تمرین مہ کن بلکیں جھد بہ کن کہ ایشی ءِ اسرارں ھم سر بہ بئے پرچا کہ اِزم ءُ زانت مردم ءَ ھُداوند ءِ کِر ءَ بارت ءُ سر کنت۔

۶۷۔ زیمر باید اِنت یک مردینے ءِ دل ءِ تہ ءَ آس روک بہ کنت ءُ یک جنینے ءِ چمّانی ارساں شَل بہ کنت۔

  ۶۸۔ وتی چُکّانی گْور ءَ شَرّی ءُ نیکی ءِ ستا ءَ بہ کن ئے ءُ اِے چیز وت آھاں وشّھال کنت نَے کہ تِلاہ ءُ زیور۔

 

 

لُڈ وِگ وین بیتھوِن

 

۶۹۔ تو تھنا یک رندے زند گْوازین ئے بلے اگاں تو یکیں رند ءَ ھم شَرّ گوازینت، یک رندے بس اِنت۔

۷۰۔ چوناھا من لبّ ءُ تماہ ءَ ڈالچار کن آں داں وھدے کہ من آئی ءَ داشت کُت مہ کن آں۔

۷۱۔ تو ھجبر اینچو پیر نہ ئے کہ جوان بہ بئے۔

۷۲۔ ھر ھما کار کہ کنگ کرز اِیت باید اِنت مدان مدان ءَ کنگ بہ بیت۔

۷۳۔ دْراھیں رَد کُتگیں مھر کنوکیں مردم باید اِنت دگہ یک موھے دیگ بہ بنت بلے اِے رندی گوں دگہ کسے ءَ ۔

 

مَے ویسٹ

 

 ۷۴۔ تو اگاں چیزے ءِ ھاتر ءَ نہ اوشت ئے گڑا تو ھرچیز ءِ ھاتر ءَ کپ ئے۔

۷۵۔ تو باید اِنت وتن دوستی ءِ تہ ءَ اینچو کور مہ بئے کہ راستی ءِ دیم ءَ ھم اوشتات مہ کن ئے۔ رَد رَد اِنت توری کسے ھم بہ کنت ئِے یا بہ گْوش اِیت ئِے۔

۷۶۔ منی دربرجاہ کتاب بیتگ اَنت، یک شَرّیں کتابجاھے بیتگ۔ من وتی تیوگیں زند وانگ ءَ گوازینتگ کہ وتی ھمے شوھاز ءِ ھُبّ ءَ دلجم بہ کن آں۔

۷۷۔ من راستی ءِ منوک آں توری کسے ھم بہ گْوش اِیت ئِے۔ من اِنساپ ءِ منوک آں توری کسے ءِ ھم ھاتر ءَ بگیر ءَ بہ بیت۔ من دْرستاں چہ پیسر یک انسانے آں پہ ھرچیز ءُ ھرکس ءَ اگاں کسے چہ منی انسانیت ءَ نپ چست بہ کنت۔

۷۸۔ وانگ ءُ زانشت باندات ءِ ھاتر ءَ مئے پاسپورٹ اِنت پرچا کہ باندات پہ ھما مردماں اِنت کہ باندات ءِ ھاتر ءَ مرچی تیاری کن اَنت۔

۷۹۔ راستی زُلم آماچیں مردمانی نیمگ ءَ اِنت۔

۸۰۔ مردماں سما نیست کہ چتور یک مردمے ءِ سرجمیں زند گوں یک کتابے ءَ بدل بیت کُت کنت۔

۸۱۔ ایمن بہ بئے، ادب دار بہ بئے، کانود ءِ پاسداری بہ کن، ھرکسی شرپ ءَ بہ کن بلے اگاں کسے وتی دست ءَ تئی سر ءَ ایر کنت گڑا آئی ءَ مانشجاہ ءَ سر کن۔

۸۲۔ ترا گاں ایراد گِروک نیست گڑا بگندئے ترا اینچو سوبمندی مہ رس اِیت۔

۸۳۔ اگاں کسے وتی دستاں تئی سر ءَ ایر کنت انچوش بہ کن کہ دگہ برے آ پد ءَ ھجبر وتی دستاں کسے ءِ سر ءَ ھم ایر مہ کن اَنت۔

۸۴۔ برے برے ترا تُپنگ ایرکنگ ءِ ھاتر ءَ تُپنگ چست کنگ لوٹ اِیت۔

۸۵۔ پیسر ءَ من وتی زند ءِ تہ ءَ ھمے دربرتگ کہ اگاں ترا چیزے لوٹ اِیت گڑا گھتر ھمیش اِنت کہ کمے جاک ءُ توار بہ کن۔

۸۶۔ مارا پہ یک دگرے ءَ گیشتر رُژن لوٹ اِیت۔ رُژن سرپدی ودی کنت، سرپدی مھر ودی کنت، مھر اوپار ودی کنت ءُ اوپار تپاکی ودی کنت۔

۸۷۔ تو اگاں ایشی ءِ ھاتر ءَ مِرگ ءَ تیار نہ ئے گڑا چہ وتی گال امبار ءَ لبز ء آجوئی ءَ کَشّ۔

۸۸۔ لسّ جاوراں وھدے کہ مردم گمیگ بنت آ ھِچّ نہ کن اَنت۔ آ تھنا وتی جاورانی سر ءَ گریو اَنت۔ بلے وھدے کہ آ زھر ءِ توک ءَ بنت آ کارے کن اَنت۔

۸۹۔ تو چتور آ مردم ءِ منّتواری ءَ ادا کُت کن ئے کہ آ ترا ھما چیز ءَ دنت کہ چہ پیسر ءَ تئی وتیگ اِنت؟ پد ءَ چتور تو آئی ءِ تھنا تئی جند ءِ ھمے یکیں بھر ءِ دیگ ءَ گوں منّتواری ءَ ادا کُت کن ئے؟

 ۹۰۔ ما دگرانی گْور ءَ مَنّگ بیگ ءِ بابت ءَ داں ھما وھد ءَ جیڑ اِت کُت نہ کن اِیں داں وھدے کہ پیسر ءَ ما وتی جند ءِ گْور ءَ وتی مَنّگ بیگ ءِ بابت ءَ سابت کُت نہ کن اِیں۔

۹۱۔ تو من ءَ کپیٹلیسٹے  پیش دار من ترا یک ھونوارے پیش دار آں۔

۹۲۔ یک دانائیں مردمے یک ھوڈیں مردمے ءِ کِرد ءَ ادا کُت کنت بلے یک ھوڈیں مردمے یک دانائیں مردمے ءِ کِرد ءَ ادا کُت نہ کنت۔

 

 

مالکم ایکس

 

 

 

سرشون:

Brilliant Quotes – An App from Google Play Store