پیاپیں ٹَوک (پانزدھمی بھر)

 

رجانکار: اُزیر مھرؔ

۱۔ مردم ءِ مزن شانی ھمے  کِرد ءِ جوانی ءَ پیلو کنگ ءِ تہ ءَ اِنت کہ مارا ھمے کِرد وتی گُشاد ءُ شرّی ءَ  پیلو کنگ لوٹ اِیت۔یک کِردے وتی سرجمی ءُ شرّی ءِ ھاتر ءَ  کہ ما زیر اِیں اِے مئے ساچشتکاری ءِ مستریں درشان اِنت۔

۲۔ ترا بیرگیں  وت پیلھی تھنا ایوکیں زند ءَ رس اِیت۔

۳۔ دُوا ھداوند ءِ نیمگ ءَ پچّ ترگ ءِ نام اِنت۔

۴۔ ما دُوا ءُ ابابت ءَ وتی جند ءِھاتر ءَ ناں بلکیں وتی سیتّ ءُ نپ ءِ ھاتر ءَ جیڑ اِیں۔

۵۔داں ھما وھد ءَ  تو دنیا ءَ ھرروچ ھما پیم چارگ ءِ جھد مہ کن ئے انچوش کہ ھُداوند ئِے چار اِیت تو گڑا تھنا سرزاھریں گوناپ ءُ ندارگاں آ دیم ھِچّ دیست کت نہ  کن ئے۔

۶۔مردم ءِ مزنی ءِ کساس چہ آئی ءِ اِے کار ءَ  بیت کہ آ گوں دگہ مردماں کجام کچّ ءُ ھساب ءَ گپّ ءُ تران، دوستی ءُ نِند ءُ پادآیگ کنت۔

۷۔ وت ءَ را چہ ھما مردماں دیر بہ دار کہ تئی واھگ ءُ امیتاں جھل جن اَنت۔ انچائیں مردم مدام انچوش کن اَنت بلے اسل مزنیں مردم ترا اِے مارشت ءَ دے اَنت کہ تو ھم مزن جوڑ بیت کت کن ئے۔

۸۔ وھد ءُ دمان ءِ لزّت انچوش کہ سرپگ ءَ لگّ اِیت گیمرگ ءَ بندات کنت۔ وھد ءِ سنگدلیں  رَشت ءُ آپجت ءَ مئے وشّی زیتّ اوگارگ بنت۔

۹۔ اِنسان ءِ جسم یک کید ءُ گواز اِنت۔ اِے تھنا آئی ءِ ارواہ اِنت کہ شھشناب ءُ بے گواز اِنت۔

مائیکل کوئسٹ

۱۔دنیا ءِ مستریں تخت ءِ سر ءَ بیگ ءَ پد اوں ما گوں  وتی  جند ءِ بُن ءَ نِند اِیں۔

۲۔من اِے بابت ءَ باز پگر ءُ سسا نہ کن آں کہ من پہ دگراں چون آں چہ اِے گپ ءَ گیش کہ من پہ وت ءَ چون آں۔

۳۔من دگرانی گپ ءُ گُشتناں تھنا  پمیشکا پرّام آں دانکہ وت ءَ را گھتر درشان کت بہ کن آں۔

۴۔وھدے کہ مونجا ءُ ملور کنوکیں ھیال من ءَ پیڑا اَنت ءُ منی سر ءَ اُرش کن اَنت گڑا ھچّ چیز منی کمک ءُ مدت کت نہ کنت چوش کہ دیم پہ کتابانی نیمگ ءَ دِرک بندگ ءُ تچگ من ءَ کمک کنت۔ کتاب من ءَ زیت مُلمہ کن اَنت ءُ  منی مجگ ءِ تہ ءِ مونجا ءُ ملوریں ھیالانی ساھیلیں جمبراں  تاچین اَنت ءُ ھلاس کن اَنت۔

۵۔دنیا ءِ تہ ءَ چہ درستاں مستریں چیز ھمیش اِنت کہ بزان ئے چتور گوں وت ءَ سیادی کن ئے۔

۶۔ما  چہ دگہ مردمانی اِلم ءُ زانت ءَ بگندئے دربہ بر اِیں ءُ زانتکار بہ بئیں: بلے ما دانا تھنا ھما وھد ءَ بئیں وھدے کہ چہ وتی جند ءِ دانائی ءَ در بر اِیں۔

۷-اگاں من وتی بابت ءَ جتائیں داباں  گپّ ءُ تران کن آں گڑا  چوش  پمیشکا  کہ من وت ءَ را جتائیں داب ءُ دروشماں چار آں۔

۸-ھما مردم کہ چہ تگلیپ ءُ آزار ءَ تُرس اِیت  آ چہ ساری ءَ ھما چیز ءِ آزار ءُ گلیپ ءَ سگگ ءَ  اِنت کہ چرآئی ءَ تُرس ایت ئِے۔

۹-ھِچّ چیز یات ءُ تھتال  ءِ تہ ءَگوں ترندی ءَ پیوست بیت کت نہ کنت چوش کہ آ چیز ءِ شموشمگ ءِ واھشت۔

۱۰-مارا  چہ ھر چیز ءَ  کہ مکن کنگ بیت مئے   واھشت ءُ واھگے پہ ھما چیز ءِ تلب ءَ ودی بیت۔

۱۱- من ءَ نا وانندگ ءُ  نزانتکارانی ھمراھداری  دوست تر بیت پرچا کہ آھاں اینچو اِلم ءُ زانت در نہ بُرتگ کہ ردیں   ءُ  بے راھبندیں باوست بہ کن اَنت۔

۱۲-منی زند ھرابیں جاور ءُ بدھالیاں چکار اِنت، چرآھاں گیشتر ھما اَنت کہ دنیگت ءَ نہ بیتگ اَنت۔

۱۳-دانائی ءِ چہ درستاں   پکاّئیں چیدگ گلَ ءُ شادھی اِنت۔

۱۴-وسوس ءُ زورآوریں ھیال دانائی ءُ گنوکی  ءِ بنزہ انت۔

۱۵-منی اِزم ءُ کار زندگی کنگ اِنت۔

۱۶-پہ دگراں وت ءَ را ادارکی بہ دئے  بلے پہ وت ءَ وت  ءَ را مُجّتی بہ  دئے۔

۱۷-شَرّیں سانگ ھما وھد ءَ بیت وھدے کہ زال کورے بیت ءُ جود کَرّے بیت۔

۱۸-اگاں ماں دنیا ءَ  یک شَرّیں سانگے ھست گڑا ھما اِنت کہ چہ مھر ءَ گیش دوستی ءِ  چھرگ ءُ رنگ ءَ جنت۔

۱۹- من  اینچو راست نہ گُش آں اینچو کہ من ءَ گُشگ لوٹ اِیت بلے امینچو گُش آں امینچو کہ من گُشگ ءِ ھمّت کن آں ءُ ھردیں کہ من مزن تر بیان باں من گیشتر ھمّت کن آں۔

۲۰- وتی ھیال ءُ لیکہ ءِ سر ءَپُرجوشی ءُ وتسری ءَ پیوست بیگ ھوڈی ءِ شرتریں منّانک اِنت۔

مائیکل  ڈی مونٹییگنے 

۱- بتل گونڈیں گالرِداں  کہ چہ دراجیں کُتہ کاریاں در آتکگ اَنت۔

۲-اگاں کسے نہ بیتگین  ءَ کٹّگ ءُ زیرگ لوٹ اِیت گڑا آ مردم باید اِنت یک بے سریں جھدے بہ کنت۔

۳- بازیں ساری  بگندئے بے ساری یے ءُ درستاں چہ مستریں بے ساری  ھمیش اِنت کہ زند ءَ انچوش بہ چارئے انچوش کہ زند ھست اِنت نئیکہ انچوش زند بیگ لوٹ اِیت۔

۴-مھتلی مدام ھترہ ودی کنت۔ شریں مراگہ ءُ مراسا ءِ دراجکشّ کنگ آئی ءِ زیان کنگ اِنت۔

۵-جُھد ءُ جپا  وژھالی ءُ آسودگی ءِ مات اِنت ءُ سُستی ءُ بیکاری ایشی ءِ بگیر اِنت کہ ھچّ مردم ءَ را آئی ءِ  جوان تریں ھچّ واھشتانی مول ءُ مراد ءِ کِّر ءَ نیاورتگ ئِے۔

۶-ترندآپ  ءَ پہ کساس بہ نوش کہ ھنوشی  نئیکہ راز دار اِیت ءُ نئیکہ وادہ ءُ سوگند۔

۷-ساری ءَ ڈاہ داتگین ءُ ساری ءَ سلاھبند ءُ جریدگیں،  چہ ساری ءَ تیار ءُ ساجو بیگ نیم گرھبری اِنت۔

۸-اسل دلیری  بُزدلی ءُ اِشتاپی ءِ میان ءَ اِنت۔

۹-شَرّیں کار ءُ کنش مارا سربلند کن اَنت  ءُ ما وتی کار پد ءُ کنشانی پُسّگ اِیں۔

۱۰-ھما مردم کہ شرّ زند گوازین اِیت آ مردم شرّ واز ءُ نسیت کت کنت۔

۱۱-تو من ءَ وتی مجلس ءُ نیاد ءَ بہ گوش  ءُ من ترا ءَ گوش آں کہ تو کے ئے۔

۱۲-ھما چیز کہ پرآئی ءَ کم  نھاد لگ اِیت، آ کم ارزشت کرز اِیت۔

۱۳-مال ءُ دولت ءِ وشّی ءُ سیری تھنا آئی ءِ دزگرگ ءُ مالک بیگ ءِ تہ ءَ نہ اِنت  ءُ نئیکہ زرّزوالی ءِ تہ ءَ اِنت  بلکیں اِے وشّی آئی ءِ شرّ کارمرزگ ءِ تہ ءَ اِنت۔

۱۴-مردمےءِ  وتی جندءِ بابت ءَ  اِلم ءُ زانت آئی ءَ را چہ  گروناکی ءَ رکین اِیت۔

۱۵-وت گلائی ءُ  بٹاک ءِ  یک سیت ءُ نپے ایش اِنت کہ گپ جنوک درسمائی رِد ءَ وتی  جند ءِ ھیال ءُ لیکہ ءِ درشانی کنگ ءَ اِنت۔ آئی  ءَ را  بِل کہ ھمے داب ءَ  وتی درانگازی ءَ کنت ءُ  گیشتر بہ گوش اِیت دانکہ آ وتی گپانی مانزمان بہ بیت۔

۱۶-وھد ھر چیز ءَ  را پچ اِیت ءُ پھتو کنت؛ کس دانا ودی نہ بیت۔

۱۷-وھدے کہ چہ امیت ءَ گیش تُرسگ ءِ گیشتر  سبب بہ بیت  گڑا پُشت ءَ کنزگ تچگے نہ اِنت ءُ اوشتگ ءُ جلّگ دانائی یے نہ اِنت۔

۱۸-سُستی ھجبر یک شَریں واھشتے ءِ  دزگرگ ءَ نہ رستگ۔

۱۹-ھما چیز ءِ کہ کمائینگ ءِ ترا واک ءُ وس ھست آئی ء ِ  ھجبر ودار مہ کن ءُ  مہ پِنڈ۔

۲۰- مئے مستریں دژمن  کہ گوں آھاں مارا ھاس مڑگ لوٹ اِیت، آ مئے جند ءِ اندر ءَ اَنت۔

۲۱-مسکرائی ءُ ٹٹولی کہ درد ءُ تورشت دے اَنت مسکرائی نہ اَنت۔

۲۲-اِے پیم کزا یک برے بہ بیت کہ کجام ھم وشّی یے  پھک ءُ زگری ءَ بئیت کہ آ گوں گم ءِ ھور ءُ ھواری ءَ بدل ءُ کم مہ بیت۔

۲۳-ھما مردم کہ مال ءُ دولت ءَ ببا دنت  بزاں سک با ز چیز ببا دنت، ھما مردم کہ دوستے ءَ ببا دنت بزاں گیشتر چیز ببا دنت بلے ھما مردم کہ ھمت ءُ توکل ءَ ببا دنت بزاں آ، ھر چیز ءَ  ببا دنت۔

میگل دے سیروانٹیس

 

۱-یک زیبائیں چیزّے ھجبر اینچو درد ءُ تورشت نہ دنت اینچو کہ آئی ءَ  نہ گِندگ ءُ نہ اِشکُنگ-

۲-یک انسانے گوں وتی دستاں ناں بلکیں گوں وتی مجگ ءَ نکش کشّی ءُ گوناپ سازی کنت۔

۳-مھر ءُ مرگ دو بانزل اَنت کہ شَرّیں مردم ءَ را  گُلباگ ءَ بر اَنت۔

۴-ھر زیبائی یے کہ ما دنیا ءِ تہ ءَ گند اِیں آ ھُداوند ءِ گوناپ ءُ دروشمے  کہ مارا مئے بُندری ءُ ارواھی بنزھاں جوڑ این اِیت ءُ یکجاہ کنت کہ چمود ءَ ماودی بیتگ ءُ آتلگ اِیں۔

۵-وتی سر ءَ ستک ءُ بیسہ کنگ   جوان تر ءُ سلامتیں زنداب ءُ  راھبند اِنت۔

۶-سوھوی ءُ موھری ءِ ھاتر ءَ مُجّتی سبر ءُ اوپار لوٹ اِیت۔

۷-من ھمے اُمیت  کن آں کہ شالا منی واھگ ءُ مراد مُدام چہ ھما کاراں گیشتر بات کہ من پیلو کت اِش کن آں۔

۸-اگاں ما گوں  زندگی ءَ وشّ ءُ رزا بیتگ اِیں ، گڑا مارا گوں مرگ ءَ ناوشّ ءُ نا رزا بیگ نہ لوٹ اِیت پرچا کہ اِے  گواچی ھم چہ ھمے ھُداوند ءُ مالک ءِ دست ءُ در ءَ کیت۔

۹-اِے ھژدری اِنت کہ مردم وتی  شھار ءُ دزرس ءِ پرکار ءَوتی دیدگاں بہ کنت ناں کہ دست ءَ بہ کنت پرچا کہ  دست  کار ءَ پیلو کن اَنت ءُ ھلاس کن اَنت بلے چم پیسلہ کن اَنت۔

۱۰-شَرّتریں اِزمکاراں ھم اِے گُمان ءُ ھیال نیست کہ نہ تراشتگیں ءُ شرنہ کتگیں مرمر ءِ سنگ ءِ تہ ءَ بود ءُ کمال مان نیست ءُ نئیکہ ساچشتکاری پدّر بیت کنت۔اِے کتہ کار ءُ زانتکاریں ساچشتکارانی اِزم ءُ ھُنر ءِ برورد اِنت کہ چہ سنگ ء مرمرد ءَ  زیبائیں ءُ جوانیں بُت تراش اَنت ءُ پلگاریں گوناپ اِش دے اَنت۔

۱۱-ھما سنگ ءمرمر کہ دنیگا تراشگ نہ بیتگ آ مزنیں اِزمکار ءِ چُنائیں ھیالے ءِدروشم ءُ گوناپ ءَ زُرت کت کنت ۔

مائیکل اینجلو 

۱۔ھما بدلی بہ بئے کہ تو ماں جھان ءَ گندگ ئِے لوٹ ئے۔

۲۔انچوش زندگی بہ کن گوش ئے تو باندا مرئے۔ انچوش در بہ بر گوش  ئے تو مدام زندگ مان ئے۔

۳۔چم ءِ بدل ءَ چم ءِ کشّگ تیوگیں جھان ءَ را کور کنت۔

۴۔وشّی ءُ شادمانی ھمے چیز ءِ نام اِنت کہ ھرچی تو جیڑئے، ھرچی تو گوش ئے ءُ ھرچی تو کن ئے  تئی دراھیں کار ءُکنش ھمزیل ءُ ھمسنگ بہ بنت۔

۵۔اول سر ءَ آ ترا ڈالچار کن اَنت، پد ءَ ترا کلاگ گر اَنت، رند تر ءَ گوں تو مڑ اَنت ءُ آسر ءَ تو باج برئے۔

۶۔ھرجاہ ءَ کہ مھرھست اود ءَ زندگی ھست۔

۷۔نِزوریں مردم ھجبر پھل کت نہ کنت۔ پھل کنگ مھر ءُ مھکمیں مردمانی ھاسیت ءُ شَرّی یے۔

۸۔آجوئی یے آجوئی بیگ نہ کرز اِیت اگاں آئی ءِ  تہ ءَ ردی کنگ ءِ آجوئی مان نیست۔

۹۔ھُداوند ءِ نیکراہ نیست۔

۱۰۔من کسّ ءَ نیل آں کہ منی مجّگ ءِ سر ءَ گوں وتی سلیں پاداں بہ گرد اِیت۔

۱۱۔مردم وتی ھیال ءِ برورد اِنت۔ ھرچی کہ آ جیڑ اِیت ھما جوڑ بیت۔

۱۲۔کس من ءَ بید ء منی اجازت ءَ  من ءَ دردیگ ءُ زھمیگ کت نہ کنت۔

۱۳۔وتی شوھازگ ءُ پولگ ءِ گھتر ءُ شرتریں راہ ھمیش اِنت کہ وت ءَ را دگہ مردمانی ھزمت ءِ تہ ءَ گار  بہ کن۔

۱۴۔یک دلے ءَ گوں یک کار ءُ کردے ءَ وشّی دیگ چہ ھزاراں سرانی ابابتءِ تہ ءَ جھل بیگ ءَ گھتر اِنت۔

۱۵۔ھرچی کہ تو کن ئے آ پوچک ءُ بے پکرات بیت بلے اِے باز المی اِنت کہ تو پد ءَ ھم آ کار ءَ بہ کن ئے۔

۱۶۔مردم گری ءِ سر ءَ تئی سِتک ءُ بیسہ باید اِنت ھلاس مہ بیت۔ مردم گری  زِر ءِ پیم ءَ اِنت۔ اگاں زِر  ءِ لھتیں ترمپ ناپاک اَنت تیوگیں زِر ناپاک نہ بیت۔

۱۷۔من جنگ ءُ شدت ءِ بگیر ءَ آں  پرچا کہ وھدے شِدت شر  درا بیت اِے ادارکی شَرّی یے بلے ھرابی کہ چریشی ءِ سوب ءَ ودی بیت آ دائمی ھرابی یے۔

۱۸۔ھرشپ کہ من وپسگ ءَ رو آں من مرآں ءُ دومی سھب ءَ وھدے کہ من چہ واب ءَ پاد کایاں من دوبر ودی باں۔

۱۹۔ھردیں کہ تو گوں وتی ھلاپیں مردمےءَ دیم پہ دیم بیت ئے۔ آئی ءِ سر ءَ گوں مھر ءَ باج بر۔

۲۰۔زمین ءِ سر ءَ ھر بنی آدم ءِ زلورتانی مزنیں کساسے ءَ دلجمی ءُ  سیری  ءِ سامان ھست  بلے ھرمردم ءِ لالچ ءُ تماہ ءِ دلجمی ءِ سامان نیست۔

۲۱۔ تئی کار ءُ کنش تئی گھتر ءُ پرارزشتیں کارانی بابت ءَ درشان اِیت۔

۲۲۔ مھر دنیا  ءِمھکم تر ءُ زور آور تریں تاکت اِنت بلے پد ءَ اوں درستاں چہ آجز تر یں لیکہ ءُ ھیال اِنت۔

۲۳۔تو من ءَ بندیگ کت کن ئے، تو من ءَ  دردءُآزار دات کت کن ئے، تو منی جسم ءُ بالاد ءَ ھم تباہ ءُ برباد کت کن ئے بلے تو منی مجگ ءَ بِھ بندیگ کت نہ کن ئے۔

۲۴۔ھچّ چیز چو پریشانی ءِ پیم ءَ جسم ءَ زیان  ءُ نزور نہ کنت۔ھرکس ءَ کہ ھُداوند ءِ سر ءَ ستک ءُ بیسہ اِنت آ بایداِنت  چُنائیں ھم چیزے بابت ءَ  پریشان بیگ ءَ ھجالت بہ بیت۔

۲۵۔من دنیا ءِ دراھیں مزنیں نیکراھانی بُنکی راستی ءَ منّ آں۔

۲۶- زور ءُ تاگت چہ جسمانی ءُ سرزاھری بود ءُ توانائی ءَ نئیت اِے چہ شکت نہ وروکیں واھگ ءُ ارادہ ءَ کیت۔

 

مھندس گاندھی

 

۱۔ من اِے چیستان درگیتکگ کہ تو داں ھما وھد ءَ مھر بہ کن ئے داں تو زھمیگ بہ بئے، آسر ءَ ھچ درد ءُ زھم نہ مان اِیت تھنا گیشترمھر مان اِیت۔

۲۔مارا ھداوند شوھازگ لوٹ اِیت ءُ آ شور ءُبے تاھیری ءِ تہ ءَ درگیجگ نہ بیت۔ھداوند ھاموشی ءِ دوزواہ اِنت۔ ابرم ءَ بہ چار، درچک، پُل، کاہ دراہ ھاموشی ءَ رُد اَنت؛ اِستال، ماہ ءُ روچ ءَ  بہ چار کہ چتور ھاموشی ءِ تہ ءَ جُنز اَنت۔ مارا ارواھانی دزسمارگ ءَ ھاموش ءُ بہ ترک ءُ توار بیگ لوٹ اِیت۔

۳۔ تو اگاں یک ھزار مردم ورگ وارینت کت نہ کن ئے گڑا  یک مردمے ورگ وارین۔

۴۔ما اِے زمین ءِ سر ءَ مزنیں کار کت نہ کن ئے تھنا کسانیں کار گوں مزنیں مھر ءَ کت کن اِیں۔

۵۔کسے ءِ نہ لوٹگ، مھر نہ کنگ، ھیال نہ دارگ، ھرکسی شموشگ، منی ھیال ءَ اِے باز مزنیں گژنے ءُ  پہ ھما مردم ءَ مستریں نیزگاری یے کہ ورگ ءَ ھچے نیست۔

۶۔وشّی مھر ءِ دام ءُ ماھور اِنت کہ چریشی ءِ سبب ءَ تو ارواھاں شکار  کت کن ئے۔یک وشّ ءُ وژھالیں دلے مھر ءِ آس ءَ روکیں دلے ءِ  سدکیں برورد اِنت۔

۷۔اِے مئے کار ءُ کنشانی کچ ءُ کساس نہ اِنت بلکیں مھر ءِ کساس اِنت ارزشت دار اِیت کہ ما کارانی تہ ءَ ھوار ئِے گیج اِیں۔

۸۔درستاں چہ مستریں نادراھیاں یکےھمیش اِنت کہ پہ کس ءَ کسے مہ بئے۔

۹۔کس ءَ ھجبر مئیل کہ گوں تو دوچار کپگ ءَ پد گھتر ءُ وشتر مہ روت۔ھداوند ءِ مھروانی ءِ زندگیں چھرگ ءُ درورے بہ بئے۔مھروانی تئی گوناپ ءِ سر ءَ، مھروانی تئی چمانی تہ ءَ، مھروانی تئی بچکند ءِ تہ ءَ پدّر بہ بیت۔

۱۰۔اِے مہ جیڑ کہ اسیلیں مھر ءِ ھاتر ءَ مھر ءَ را جتا ءُ ھاس بیگ لوٹ اِیت۔ھماچیز کہ مارا پکار اِنت آ بے دمبرگ ءَ مھر کنگ اِنت۔کسانیں کار  ءُ چیزانی تہ ءَوپادار بہ بئے پرچا کہ ھمے کارانی تہ ءَ تئی زور ءُ تاگت پھمیان اِنت۔

۱۱۔من چوتچک ءَ سدک نیاں کہ گُلباگ  چہ پیم ءَ بیت بلے اِے گپ ءَ من جزم  آں کہ وھدے ما  چرے جھان ءَ رو اِیں ءُ ھداوند وھدے کہ مئے پیسلہ ءَ کنت، آ اِے جست نہ کنت کہ 'تو وتی زندگی ءَ چینچو شَرّی کتگ؟ بلکیں اِے جست ءَ کنت،' ھما کار کہ تو ماں دنیا ءَ کتگ گوں چینچو مھر ءِ ھواری ءَ کتگ، چینچومھر تئی کار ءُ کنش ءِ تہ ءَ ھوار بیتگ؟'

۱۲۔مھر ھما نیبگ اِنت کہ ھر وھد ءَ آئی ءِموسم اِنت   ءُ ھرکسی دزرس ءَ اِنت۔

۱۳۔ایمنی گوں یک بچکندے ءَ بندات بیت۔

۱۴۔مھروانیں گال پہ گوشگ ءَ گونڈ ء ُ آسان بیت  کت کن اَنت بلے آھانی پدگوانک بیرگ ءَ بے گواز   ءُ بے آسر اِنت۔

۱۵۔گوست گوستگ، باندات انگت ءَ نیاتکگ۔ مئے گور ءَ تھنا  مروچیگیں روچ ھست اِنت۔بیا  بندات کن اِیں۔

۱۶۔گوں سادگی ءَ زندگی بہ کن دانکہ دگہ مردم ھم  گوں سادگی ءَ زند گوازینت کت بہ کن اَنت۔

۱۷۔چہ وتی  نگھپانیں پریشتگ ءَ گُشادتر سپر مہ کن۔

۱۸۔تو دنیا ءِ ایمنی ءِ دیمروئی دیگ ءِ ھاتر ءَ چی کت کن ئے؟ لوگ ءَ برو ءُ گوں وتی کھول ءَ مھر بہ کن۔

۱۹۔ھما زندگی پہ دگرانی ھاتر ءَ کنگ نہ بیتگ آزندگی یے نہ اِنت۔

۲۰۔تو اگاں آجز تبیں مردمے ئے، ھِچّ چیز ترا سانمند نہ کنت نہ کہ توسیپ ءُ ستا، نئیکہ کم شرپی ءُ  بنّامی پرچا کہ تو زان ئے کہ تو کے ئے۔

مادر ٹریسا

 

۱۔من ءَ ھیلکاری ءِ یک یک ملٹے ءِ سر ءَ کنت بیتگ بلے من گوشتگ،' یل مہ دئے۔انّی سگّ ءُ پاوان کن ءُ وتی پشکپتگیں تیوگیں زند ءَ چو باجبریں پھلوان ءَ گوازین۔

۲۔اگاں منی مجگ یک چیزے ءَ ودی کت کنت ءُ منی دل آ چیز ءِ سر ءَ سِتک ءُ یکین کت کنت گڑا  آ چیز من ءَ الم ءَ رس  اِت کت کنت۔

۳۔ھمامردم ءَ کہ ھیال ءُ  گمان نیست، آمردم ءَ را بال ءُ پَر پر نیست۔

۴۔مردمانی سر ءَ تھنا  آھانی جسم ءِ رنگ ءِ سوب ءَ زھر ورگ ءُ کنت کنگ ھرابیں گپے ءُ اِے چیز ءَ را ھچّ باکے نیست کہ کجام رنگ زِدّ ءُ کنت کنت، اِے بس پھک ءَ رد اِنت۔

۵۔تو  اگاں مول ءُ مرادے ءِ ھاتر ءَ مڑئے، تو ھچّ ببا نہ دئے۔ منی مجگ ءِ تہ ءَ شکست وارتگیں مردم ھما اَنت کہ آھانی یک مول ءُ مرادے نیست کہ آئی ءِ ھاتر ءَ آ مردم ھیال ءُ اِنانے بہ دار اَنت۔

۶۔یک مزنیں باجبر ءُ گرھبریں مردمے بیگ ءِ ھاتر ءَتو باید اِنت وتی سر ءَ اِے ستک ءُ بیسہ ءَ بہ کن ئے کہ تو چہ درستاں شَرّ ترئے۔ تو اگاں چہ درستاں شَرّتر نہ ئے پد ءَ اوں انچیں نیمونے بہ کن کہ تو چہ درستاں جوان تر ئے۔

۷۔تو ھرچی جیڑگ ءَ ئے تو ھما مردم جوڑ بیگ ءَ ئے۔

۸۔کٹوک ءُ باجبریں مردم جِم(Gym) ءَ  جوڑ نہ بنت۔ باجبریں مردم چہ ھما چیز ءَ جوڑ بنت کہ آ ھانی اندر ءِجھلانکی ءَ ھست اِنت؛ یک واھگے، یک وابے، یک دیدانکے۔

۹۔دگہ مردم بگندئے لزت ءَ زان اَنت بلے لزت وشّی یے نہ اِنت۔ایشی ءَ چہ ھما ساھگ ءَ  گیشترھچّ ارزشت نیست کہ مردمے ءِ رندگیری ءَ کنت۔

۱۰۔ھما مردم کہ زندگی ءَھترہ ءُ گپچل زیرگ ءَ  دلاور نہ اِنت، آ زندگی ءِ تہ ءَ ھچّ کار پیلو کت نہ کنت۔

مھمد الی

۱۔ھرچیز کہ دنیا ءِ تہ ءَ ما گنداِیں آ ساچشتکاریں زالبولانی  کار ءُ کرد اِنت۔

۲۔باج  پہ ھما مردمان اِنت کہ آ گشت کت کن اَنت کہ' باج منیگ اِنت' سوبمندی پہ آ ھما مردمان اِنت کہ آ گوشگ بندات کن اَنت ' من سوبمند باں' ءُ  آسر ءَگوش اَنت ' من سوبمند بیتگ آں'۔

۳۔داں وھدے کہ راج ءِ زندگی ھترہ ءُ بیم ءِ دیمپان نہ بیت، جنگ یک کوشے۔

۴۔منی گندگ ءِ  ھِچّ پیم ءَ مانا اِے نہ اِنت کہ منی دروشم ءُ گوناپ ءَ بہ گندئے۔ منی ھیالانی پھمگ ءُ سرپدبیگ منی گندگ اِنت۔

۵۔وتواجھی ءُ وت مستری دیگ نہ بیت، پچگرگ بیت۔

۶۔ھر راج ءَ اِے ھک ھست کہ پہ وت ءَ شَرّیں ءُ روائیں روشت ءِ لوٹ ءَ بہ کنت ءُ ھچ ملک دگہ ھند ءُ کشور ءِ راھبندانی پامالی ءَ مہ کنت۔

۷۔تاکت ءُ واکداری بید ء شرت ءُ کید ءَ گوں  راج ءَ سیادی دار اِیت۔

۸۔ھرجاہ ءَ کہ آجوئی نیست اود ءَ مرگ ءُ تباھی اِنت۔

۹۔سائنس دودمان، زندمان ءُ سوبمندی ءِ چہ درستاں مستریں لائکیں راھشون اِنت۔سائنس ءَ ابید دگہ راھشونے ءِ شوھازگ بے پروائی، گھیڑی ءُ  وسّاچیں باوستے۔

۱۰۔راجے ءِ زور ءُ توان ءِ وروکیں تیوگیں ھرابی نیکراہ ءِ نام ءَ کنگ بیتگ اَنت۔

۱۱۔ آھیر ،لب ءُ لالچ، ءُ  کست ءُ کینگ ءِ رکینگ ءُ دارگ ءِ ھاتر ءَ دنیا ءِ دراھیں شھر ءِ مردم اِلم ءُ زانشت دیگ بہ بنت۔

۱۲۔ما وتی راھبنداں ھِچ آزمانی کتابے ءِ بنکی راھبند نہ لیک اِیں کہ چہ ھداوند ءِ نیمگ ءَ  آتکگیں پاکتاکے ءِ بھر اَنت۔ ما وتی ھیال ءُ سکین ءَ نہ چہ آزمان ءَ ءُ نئیکہ چہ درنگیبی دنیا ءَ زیر اِیں بلکیں ما وتی سکین ءَ چہ زندگی ءَ زیر اِیں۔

۱۳۔لوگے ءِ ایمنی ملکے ءِ ایمنی اِنت ءُ ملکے ءِ ایمنی دنیا ءِ ایمنی اِنت۔

۱۴۔آجوئی ءُ وتواجھی منی کِردار ءَ جوڑ کنت۔

مستپا کمال اتاترک

 

سرشون:

Brilliant Quotes – An App from Google Play Store