ارزشت

رجانکار: اُزیر مهر

یک نامی ئیں گُشتانک دیوکے ءَ 20 $ ءِ بِلّے (Bill) ماں دیوان ءِ تہ ءَ دست چست کنان ءَ دیوان بندات کُت- 200 مردم ءِ مُچّی ءُ میڑی یے آئی ءِ گوشدارگ ءِ هاتر ءَ جم بیتگ اَت- آئی ءَ گوں دیوان ءِ مردماں تْران کنان ءَ پُرس اِت: " شُمئے تہ ءَ کَے اے 20 $ بِلّ ءَ لوٹ اِیت؟" - دوسد دست چست بوت- آئی ءَ گْوشت: " من شُمئے تہ ءَ یکے ءَ اے 20 $ ءِ بِلّ ءَ دے آں بلے پیسر ءَ من ءَ چوش کنَگ ءَ بِلّ اِت"- آئی ءَ بِلّ انچوش پْرِنچ اِت کہ کْرچک ءُ کوس ءَ پُرّ بوت- آئی ءَ پد ءَ جست کُت: " کسے هست انگت ایشی ءَ لوٹ اِیت ؟"- سرجمیں 200 مردمانی دست چست بوت اَنت-

"هاں شرّ"

آئی ءَ پسّو دات-

"اگاں من چوش بکن آں"

پد ءَ آئی ءَ بِلّ زمین ءِ سر ءَ دور دات ءُ گوں وتی پازواراں لگتمال کُت-

آئی ءَ بِلّ چست کُت ءُ نشتگیں مردماں پیش ئِے داشت- بِلّ سرجم ءَ کْرچک ءَ پُر اَت ءُ سِلّ بیتگ اَت-

"نی کَے انگت ایشی ءَ لوٹ اِیت؟"-

دْراهیں دست پد ءَ هم چست بوت اَنت-

منی دوستاں !

من شمارا یک جْوانیں درونتے ءِ نمونگ پیش داشت- من گوں بِلّ ءَ توری هرچی کُت بلے پد ءَ هم شما لوٹ اِت پرچا کہ ایشی ءِ ارزشت چوش کنَگ ءَ کم نہ بوت- اے پد ءَ هم 20 $ ءِ بِلّے اَت- باز براں مئے زند ءِ تہ ءَ زندمان مارا لگتمال کنت، دردانی جنتر ءَ دْرُش اِیت، چِڈّانی تہ ءَ مین کنت، گهین اِیت ءُ ما همے وهد ءَ هرابیں شَور کن اِیں یا جاورانی تہ ءَ نزوری پیش داریں- ما انچوش مار اِیں کہ ( ما وت ءَ را بے کدر ءُ بے ارزشت مار اِیں)- توری هرچے بیتگ یا بیت تئی ارزشت هجبر کم نہ بیت- تو یک بے درورین ءُ هاسیں مردمے ئے- اے گپ ءَ هجبر مہ شموش !

سرشون:

اے کِسّہ چہ Inspirational Stories (جزبگ ودی کنوکیں کِسّهانی ) بُکچہ ءَ زیرگ بیتگ ءُ ایشی ءِ انگریزی سرنام (Value) بیتگ-