سرگْوست:من چتور یک نبشتہ کارے جوڑ بیتگ آں

پاؤلو کوئیلھو

نبشتہ کار: پاؤلو کوئیلھو

رجانکار: اُزیر مھرؔ

  پاؤلو کوئیلھو وتی کتاب

 Like the Flowing River: Thoughts and Reflections

ءِ سردانک ءَ نبشتہ کنت کہ:

وھدے کہ من پانزدہ سال ءِ اُمر ءَ رس اِت آں یک روچے من وتی مات ءَ گْوشت:

" نی من زان آں من مزن بہ آں من ءَ چی یے جوڑ بیگ لوٹ اِیت۔ من یک نبشتہ کارے جوڑ بہ آں۔"

" اوہ تئی سر بات، تو زھم جت۔ "

مات ءَ پہ بے کساس دل ایکیمی درّائینت۔

" وتی پِت ءَ بہ چار، آ یک انجینیئرے، مزنیں زانتکار ءُ سوبمندیں مردمے۔ آ  چہ دنیا ءِ رِپک ءُ ھُنراں پہ جْوانی ءَ واکوب ءُ ھُژار اِنت۔ تو بُندر ءَ چو ھم زان ئے کہ یک نبشتہ کارے ءِ بیگ چی بیت اِنت؟"

" جی ھو۔ نبشتہ کارے ءِ بیگ ءِ مانا ءُ متلب اِنت کہ کتاب نبشتہ کنگ بہ بیت۔"

 من پہ ارزانی پسّو دات۔

" تئی ناکو ھارولڈو یک ڈاکٹرے۔ آئی ءَ بازیں کتابے نبشتہ کُتگ۔ چرآھاں لھتیں چھاپ ءُ شِنگ ھم بیتگ۔ اگاں تو وتی پِت ءِ پیم ءَ انجینیئرنگ ءِ سر ءَ دلگوش ءُ اِنان بہ دئے ءُ شَرّیں جاگھے ءَ کار ءَ بہ لَگّ ئے گڑا وتی پیّکیں وھد ءَ ھرچی کہ تئی دل لوٹ اِیت بہ کن  توری کتاب نبشتہ بہ کن۔"

" اِنّاں منی مات۔ من نبشتہ کارے بیگ ءُ کتاب نبشتہ کنگ لوٹ آں انجینیئرے جوڑ بیگ ءَ پد ناں۔"

من گْوشت۔

" ھممممم۔۔۔۔۔ بلے تو کدی پیسر ءَ گوں نبشتہ کارے ءَ گِند ءُ گِدارے کُتگ؟ تو کدی نبشتہ کارے دیستگ ھم یا ناں؟"

 مات ءَ گوں زیاتیں پِگرمندی ءَ جُست کُت۔

" اِنّاں وَ۔ تھنا اکسانی تہ ءَ دیستگ۔"

" گڑا منی چُک، تو اگاں نبشتہ کار نامیں سھدارانی بابت ءَ نہ زان ئے گڑا پرچا نبشتہ کارے بیگ لوٹ ئے؟ ھاں؟"

من پھک ءَ ھاموش ءُ بے پسّو بیتگ آں۔ ھمے واستا ءَ مات ءَ شَرّ پسّو دیگ ءِ ھاتر ءَ من جیڑ اِت کہ اِے جُست ءِ سر ءَ پَٹّ ءُ پولے کنگ لوٹ اِیت۔ بُندر ءَ نبشتہ کار چی یے بیت اِنت؟ گُڈّسر ءَ مزنیں پَٹّ ءُ پولے ءَ پد من ءَ لھتیں پسّو رس اِت۔ من سھیگ بوت آں کہ ۱۹۶۰ ءِ دھک ءِ بندات ءَ نبشتہ کارے بیگ ءِ متلب چی بیت کنت اِنت۔ بیا شمارا اوں گْوش آں:

۱۔ نبشتہ کار ھما مردم بیت اِنت کہ آ ٹوھیں چشمک چمّ ءَ کنت۔

۲۔ نبشتہ کار ھما مردم بیت اِنت کہ آئی ءِ میدّ باز مزن اَنت ءُ آئی ءَ سَر رندگ ءِ آدت نہ اِنت۔

۳۔ ھما مردم اِنت کہ ھر گپّ ءُ کار ءِ تہ ءَ وتی نیم کلاک سکّ زھر گِپت اِنت ءُ دگہ نیم کلاک سکّ ابیتک ءُ پریشان بیت اِنت۔

۴۔ آئی ءَ وتی گیشتریں وھد شراب ھانہ، ٹی ھاوس ءِ تہ ءَ وتی پیمیں نبشتہ کارانی گون ءَ جاک ءُ داوا ءُ باوست کنگ ءِ آدت بیت اِنت۔

۵۔ آ مزن مزنیں گپّ جنت اِنت۔

۶۔ آئی ءِ گْور ءَ وتی دیمتر ءِ گِدار ءِ ھاتر ءَ  کِسّہ ءِ جْوانیں نمونگ ءُ اکسے ھست اِنت ءُ آ وتی پیسریگیں گِدار ءَ تُشے اوں دوست نہ دار اِیت۔

۷۔ نبشتہ کار ءِ ڈُبّہ ھمیش اِنت کہ ھستیں دور ءِ پدریچ ءِ پھم ءَ مئیت اِنت۔ آئی ءِ سِتک ھمے بیت اِنت کہ آ ردیں زمانگے ءَ ودی بیتگ۔

۸۔ بُرز ءَ نبشتگیں گپّ ءِ آسر اِنت کہ اگاں کسے ءَ نبشتہ کارے ءِ گپّے پھم اِت گڑا نبشتہ کار ءَ بیرگ ءَ بژن بیت اِنت ءُ آ ھمے لیک اِیت کہ آئی ءَ ارزانی ءَ سرپدبیگی گپّے گْوشگ ءَ یا نبیسّگ ءَ گوں وتی جاہ ءُ مکام کستر کُتگ۔ نی آ دانائی ءِ لال ءُ گوھراں تالان کُت یا شکسات کُت نہ کنت۔ پمیشکا آ گْران تِریں گپّ ءُ گالانی نبیسّگ ءَ بندات کنت اِنت۔

۹۔ نبشتہ کار وتی نویسّ اِتگیں گپّاں کور کنت ءُ بار بار نبشتہ کنت داں وھدے کہ آئی ءَ ابید دگہ دْراھینانی پھمگ ءَ ڈَنّ بہ بیت۔

۱۰۔ لسّ مردم گال گنج ءِ کساس ۳ ھزار لبز زانت اِنت۔ اسل نبشتہ کار چہ آ لبزاں ھِچّ گال نبشتہ نہ کنت اِنت نَے کہ تْران کنت اِنت پرچا کہ آئی ءَ پشکپتگیں ۱ لَکّ ۸۹ ھزار گال کارمرز کنگی اَنت۔ نبشتہ کار ھتمن یک لسّ مردمے نہ بیت اِنت۔

۱۱۔ تھنا یک نبشتہ کارے زانت کنت کہ دومی نبشتہ کار ءَ چی نبیسّ اِتگ۔ ھمے سوب اِنت کہ دْراھیں نبشتہ کار چہ یک دومی ءَ سُچ اَنت ءُ جُش اَنت۔ اِے نپرت ءُ کینگ ءِ دگہ اوں سببے ھست اِنت۔ نبشتہ کارانی کار ءُ کسب کمّو بنت اِنت پمیشکا ھر چُنت کہ بیت کنت آ یک دومیگ ءَ جھل جن اَنت۔

۱۲۔ ءُ دگہ نبشتہ کار چوش جھل جنگ ءُ کمّ بِستار بنت اِنت کہ وھدے کہ چرآھاں یک سوبمندیں نبشتہ کارے یک انچیں کتابے نبیس اِیت کہ آئی ءِ جند ءِ ھم پھم ءَ نئیت اِنت۔   

۱۳۔ نبشہ کار سادگیں گپّانی میان ءَ تُرسناک یا درآمدیں گال کارمرز کن اَنت اِنت پہ درور، چپڑکنات، انپجار، پجائیہ، ندائیہ، اوکاپ، لکہ، لچہ، چیت، مکوڑا، رموز، راجداری، جمھوریت، اِنساپ، دود ءُ ربیدگ، اشتارکیت ءُ دگہ دگہ۔۔۔

۱۴۔ نبشتہ کار ءِ گْور ءَ زیّت وتی نیمگ ءَ اِنان ءُ دلگوش ءَ گْور کنائینگ ءِ راھبندے ھست۔ آ چوش گپّ ءَ بندات کنت اِنت، آئن اسٹائن یک ھوڈیں مردمے، ٹالسٹائی یک تژن ءُ بچکندی مردمے۔ آ واکدار ءُ واجھانی پاداں چَٹّ اِیت بزاں آ ھر یک مردمے ءَ نگد ءِ نشانگ کنت اِنت۔ چریشی ءَ ابید آ رواج گِپتگیں دیدانکانی ھم اِنکار کنت اِنت۔ گیشی ءِ دیدانک اول وَ رد اِنت۔ ایشی ءَ ابید سکّ رد اِنت۔

وھدے کہ چُشیں گپّانی کنگ ءَ مردماں مُچّ ءُ یکجاہ کنت اِنت گڑا بے وھد ءُ جاہ ءَ گپّ ءَ بندات کنت۔ یات بہ بیت کہ مردماں منّانک لوٹگ ءِ آدت نہ بیت اِنت آ ایوک ءَ نبشتہ کار ءِ زبان یا نَد ءِ کیپ ءُ چاڑ ءَ کیت اِنت ءُ گپّاں مَنّ اِیت۔

۱۵۔ وھدے کہ نبشتہ کار یک زالبولے ءَ اسرمند کنگ لوٹ اِیت ءُ گیشتر آئی ءَ زرورت کپ اِیت اِنت آ تھنا امینچک گْوش اِیت:

من یک نبشتہ کارے آں، چریشی ءَ پد دزمال یا ٹشوپیپر ءِ سر ءَ انچوش نبشتہ کنت کہ زالبول ھمے مار اِیت اِے بس منی ھاتر ءَ نبشتہ کنگ بیتگ، بلکیں چوش لیک اِیت کہ اِے نبشتہ کار ودی اوں ھمے ھاتر ءَ بیتگ کہ یک روچے منی ھاتر ءَ اِے گالرِد ءَ نبشتہ بہ کنت۔ بزّگ دام ءَ کپ اِیت۔ اِے راھبند ھجبر بے نپ نہ بیت۔

۱۶۔ نبشتہ کار یک برے کہ بُرز ءِ گْوشتگیں گپّاں کارمرز کنت ءُ چاگرد ءِ تہ ءَزْرُمبشتے چِست کنت گڑا آ چُنائیں اوں وھدے ءَ شرگدارے جوڑ بیت کنت۔ بزاں اِے رِد ءَ زْرُمبشتے ءِ چست کنگ ھژدری اِنت چُنائیں لبزانکی ھزمتے ءِ پیلو کنگ گیشتر الّمی نہ اِنت۔ نبشتہ کار یک شرگدارے ءِ بِستار ءَ وتی دلدوستيں ندکاراں کہ آھاں آ دوست وَ مَنّ اِیت بلے نبشتہ کار اِنّاں، آھانی نوکیں کتابانی سر ءَ پہ رھمدلی بزاں شَرّیں یا پوزیٹو زانشتی چمّشانک دنت ءُ پَرّیچ اِیت۔ نیم چمّشانکانی تہ ءَ آ دگہ ملکانی گالریچ ءُ اجبیں زبان ءَ کارمرز کنت اِنت۔ تھنا لبزانی جوڑِشت ءَ چہ سما بیت کہ کمّو وَ شَرّ نبیسّگ بیتگ۔ آ گیشتر جاہ ءَ زاتی منّانک ءِ وڑیں لبزاں کارمرز کنت۔ اِے پیم ءَ آ پہ باز شیوّاری ءَ وانوکاں شکّ ءُ جیڑگ ءَ پِرّین اِیت۔  ھمے ھاتر ءَ وانوک ھما کتاب ءَ بھا ءَ نہ گِر اَنت چیاکہ زاتی ھیال ءُ لیکہ ءِ زانگ ءِ ھِچّ پائدہ نیست اِنت۔ زاتی ءُ منّانک چہ یک دومیگ ءَ جتا اَنت۔

۱۷۔ اگاں نبشتہ کارے ءَ جُست کنگ بہ بیت کہ آ مروچاں چی وانگ ءَ اِنت گڑا آئی ءِ سر ءَ پرز اِنت کہ یک انچیں کتابے ءِ نام ءَ بہ گیپت کہ کسّ ءَ نہ ونتگ بلکیں چوش بہ گْوش کہ کسّ ءَ آئی ءِ نام ھم مالوم مہ بیت۔

۱۸۔ البت چُشیں کتابے الّم بیت کہ آئی ءِ نام ءِ گِرگ ءَ دْراہ گَل بنت بلے نبشتہ کار ءِ پجّیگ ءَ کسّ ءَ اوں نہ ونتگ پہ درور جیمز جوائس ءِ یولیسس یا توری پرھنگ آسپیہ ءَ سرپد بہ بئے۔ بلے اگاں کسے یک نبشتہ کارے ءَ کتابے ءِ بابت ءَ چیزّے جُست بہ کنت گڑا دیمی نیمگ ءَ چہ انچیں پسّوے دنت کہ کجام ھم کتابے ءِ دْرچ ءَ دیگ بیت کنت۔   

اِے دْراھیں پَٹ ءُ پول ءُ سرپدی ءِ جمّ کنگ ءَ پد من مات ءِ گْور ءَ شُت آں ءُ آ یک یک ءَ سرجم ءَ گْوشت کہ نبشتہ کار اِے بیت اِنت۔ مات ءَ بے کساس اجکّھی ءَ درّائینت:

" اِے مزنیں اڑ ءُ جنجال ءَ چہ گھتر اِنت کہ تو انجینیئرے بہ بئے۔ تو انچوش ھم چشمک چمّ ءَ نہ کن ئے۔"

بلے منی میدّ الّم ٹَٹ اِتگ بیتگ اَنت ایشی ءَ ابید منی کیسّگ ءَ گالوسز ءِ سگریٹ ھم مان اَت۔منی بگل ءِ چیر ءَ اوں یک گْرانیں کتابے ءِ لھتیں دِرتگیں تاک اِت اَنت۔ پھم ءَ نیاوکیں گِدارے ءِ وانگ ءِ ارادہ ھم ھست اَت۔ بزاں منی تہ ءَ نبشتہ کارے بیگ ءِ دْراھیں چیدگ مان اِت اَنت۔

پاؤلو کوئیلھو ءِ نبشتگیں کِتاب

پد ءَ یک گُشندھے ءَ گوں من راھوت کُت۔ من مُجّتی زند ءِ پیمیں بُنگپّانی سر ءَ پٹ ءُ پول ءِ بدل ءَ سادہ ءُ لسّ بُنگّپانی سر ءَ لچّہ کاری بندات کُت۔ پہ درور جنین ءِ مھر ءُ مُھبت، مردین ءِ تاکت، جنگ، سرکشی ءُ دگہ دگہ۔ ھمے رِد ءَ من دنیا ءِ امینچک مُلکانی تَرّ ءُ تاب کُتگ بگندئے کہ اینچک رند ءَ وَ من وتی موزگ ھم بدل نہ کُتگ آں۔        

بلے مروچی سرجمیں دنیا ءَ ءُ ھر زبان ءَ منی کتابانی کروڈانی کساس ءَ دانگ بھا بیتگ اَنت ءُ ھر یک کتابے بیستمی رند ءَ چھاپ ءُ شِنگ بیتگ۔ من اِے گپّ ءَ منّ آں کہ من ۱۵ سال ءِ سند ءَ وتی پَٹ ءُ پول ءِ رِد ءَ یک شَرّیں نبشتہ کارے جوڑ نہ بیتگ آں۔ گوں من آ وڑیں جاک ءُ سلوات نہ بوت۔ ھمے سبب اِنت کہ لبزانکی دیوان ءُ گَلّانی نیمگ ءَ منی گیشتر نگد ءُ  ایرادگِری کنگ بیت بلے من وت ءَ را بدل کُت نہ کن آں۔ وھدے کہ وانوک اندر ءَ چہ نبشتہ کار ءِ راھبنداں ابید منی گپّاں سرپد بنت گڑا آ باز گَل بنت۔ بگندئے گیدی ءَ اِے وَشّی ءُ شادھی مَنّ اِتگ ءُ من ءَ گیدی گیشتر دوست اِنت۔

سَرشون:

Like the Flowing River: Thoughts and Reflections

Written by: Paulo Coelho