پِنسل ءِ کِسّہ

رجانکار: اُزیر مھرؔ

پِنسل جوڑکنوک ءَ پِنسل ڈَبُک ءَ کنگ ءَ پیسر یکّ کِرّ ءَ ایر کُت۔

 آئی ءَ پِنسل ءَ را گْشت:   

" ترا دنیا ءَ دیم دیگ ءَ پیسر پنچ چیزّ زانگ لوٹ اِیت۔ مُدام ایشاں یات بہ کن ءُ بِھ مہ شموش اِش گڑا تو دنیا ءِ جْوان تِریں پِنسل بیت کن ئے۔"

  اولی : تو باز شَرّ ءُ جْوانیں کار کُت کن ئے اگاں تو وت ءَ را کسے ءِ دست ءَ دیگ ءَ بِلّ ئے۔

دومی: تو وھد وھد ءِ سر ءَ دردناکیں تراشگ ءِ دیمپان بہ ئے بلے ترا یک گھتریں پِنسلے ءِ بیگ ءَ اِے چیز پکار اِنت۔

سیمی: تو ھرچ وڑیں ردی یے کہ کن ئے آھاں تو راست کُت کن ئے۔

چارمی: تئی دْرستاں چہ شَرّتِریں بھر تئی اندر ءَ اِنت۔

پنچمی: ھر جاہ ءَ کہ تو کارمرز بئے وتی چیدگ ءُ نِشان ءَ ایر بہ کن۔ توری چُنائیں جاورھالے بہ بیت ترا یکشل ءَ نبیسّگی اِنت۔

پِنسل سرپد بوت ءُ اِے راھبندانی یات کنگ ءِ وادہ ئِے کُت۔ وتی بُندری مول ءُ مراد ءَ سرپد بیگ ءَ پد ڈَبُک ءِ تہ ءَ شُت۔  نی پِنسل ءِ جاگہ ءَ گوں تو ترا تْران ءَ آں۔ اِے گپّاں مدام یات بہ کن ءُ ھجبر مہ شموش اِش گڑا تو گیدی ءِ تہ ءَ جْوان تِریں مردم بیت کن ئے۔

اولی گپّ: تو باز مزنیں ءُ جْوانیں کار کُت کن ئے اگاں تو وت ءَ را ھُداوند ءِ مھروانی ءُ رزا ءِ سر ءَ یل بہ دئے ءُ دگہ مردماں اِے موہ ءَ بہ دئے کہ اَچ ترا ءُ تئی ھُدا دادیں بازیں بودِشتاں سیتّ ءُ نَپ بہ زیر اَنت۔

دومی گپّ: تو وھد وھد ءِ سر ءَ دردناک ءُ نگیگیں ساھتانی دیمپان بہ ئے۔ زند ءِ جتائیں اڑ ءُ جنجالانی تہ ءَ گْوزگ ءَ پد ترا مھکم ءُ توانائیں مردمے بیگ ءِ ھاتر ءَ اِے چیزّ پکار اَنت۔   

 سیمی گپّ: ھر ردی یے کہ تو کن ئے آئی ءَ را تو راست اوں کُت کن ئے۔

چارمی گپّ: تئی دْرستاں چہ پُر ارزشتیں بھر مُدام تئی جند ءِ تہ ءَ اِنت۔

 پنچمی گپّ: زند ءِ ھر پِڑ ءِ تہ ءَ تو روئے باید انِت وتی نِشان ءُ پداں ایر بہ کن ئے۔ توری چُنائیں جاورھالے بہ بیت تو وتی کاراں برجاہ بہ دار۔

چہ پِنسل ءِ اِے کِسّہ ءَ دلبڈّی ءُ جزبگ بہ زیر کہ تو یک ھاسیں مردمے ئے ءُ تھنا تو ھما کار ءَ سرجم کُت کن ئے ءُ مول ءُ مراد ءَ ئِے سر بیت کن ئے کہ ھمائی ءِ ھاتر ءَ تو ودی کنگ بیتگ ئے۔

وت ءَ را ھجبر دلپْروش بیگ ءَ میل نَے کہ چوش بہ لیک کہ تئی زند پوچ ءُ بے بِستار اِنت ءُ تو وتی زند ءَ بدل کُت نہ کن ئے۔

سَرشون:

Parable of The Pencil

From the book 100 Moral Stories

Compiled by: Akramulla Syed

   http://www.islamicoccasions.com