زھر مہ گِر

 

 

 

رجانکار: اُزیر مھرؔ

 

یک وھدے ءِ گپّ اِنت کہ یک گرم تبیں کسانیں بچکے ھست اَت۔ آئی ءِ پِت ءَ آئی ءَ را بُکچھے کیلّہ دات ءُ آئی ءَ را گْوشت ئِے تو ھر وھد ءَ برانز گِر ئے گڑا ترا پَلّ ءِ پُشتی نیمگ ءَ کیلّھے ٹوکگ لوٹ اِیت۔

 

اولی روچ ءَ بچک ءَ ۳۷ کیلّہ پلّ ءِ تہ ءَ ٹوک اِت۔ آیوکیں لھتیں ھپتگاں پد آئی ءَ وتی زھرگِرگ سوگھی ءَ داشت کُت۔ ھر روچ کیلّھانی کچّ ءُ کساس کمتر بوان بوت۔ آئی ءَ پَلّ ءِ تہ ءَ کیلّہ ٹوکگ ءَ  چہ گیش پہ ارازنی ءَ وتی زھرگِرگ ءِ سر ءَ باج برگ ھیل کُت ءُ مھکم داشت کُت ئِے۔ گُڈّسر ءَ ھما روچ آتک کہ بچک کلھے ھم زھر نہ گِپت۔ آئی ءَ وتی پِت ءَ را اِے بابت ءَ گْوشت ءُ پِت ءَ ھمے سَلاہ دات کہ نی تو اینچک زھر نہ گِرئے گڑا نی چُش بہ کن کہ ھما ٹوک اِتگیں کیلّھاں چہ ھر روچ یک کیلّھے بہ کَشّ۔روچ گْوزان بوت اَنت بچک آسر ءَ اِے لائک بوت کہ وتی پِت ءَ را گْوشت ئِے دْراھیں کیلّہ من کَشّ اِتگ آں۔ پِت ءَ وتی چُکّ ءِ دست گِپت ءُ دیم پہ پَلّ ءِ نیمگ ءَ بُرت ئِے۔

آئی ءَ دَرّائینت:

تو باز جْوان کُتگ،منی چُکّ بلے پَلّ ءِ تہ ءِ اِے ٹُنگاں بہ چار۔ نی اِے پَلّ ھجبر پیشیگیں پَلّ نہ بیت۔ وھدے کہ تو زھر ءُ کُٹکا ءِ تہ ءَ گپّاں گْوش ئے آھانی پد ءُ نِشان ھمے پیم ءَ ایر بنت۔ تو یک مردمے ءِ لاپ ءَ کارچے جَن ئے ءُ کَشّ ئے توری تو امینچک رند ءَ بہ گْوش من ءَ پھل بہ کن بلے ٹَپّ ءُ ٹور انگت وتی جاہ ءَ بنت اِنت ءُ زبان ءِ داتگیں ٹَپّ ءُ ٹور انچو ھراب اَنت انچُش کہ جسم ءِ سر ءَ۔

 

سَرشون:

75 Greatest Motivational Stories Ever Told

Compiled by: Motivational Joe

Website: www.motivationaljoe.com