پَلشتیں گُد

نبشتہ کار:  پاؤلو کوئیلھو

رجانکار:  اُزیر مھرؔ

 

یک جْوانسالیں جوڑھے یک نوکیں میتگے ءَ اتک۔ دومی روچ ءَ سُھب ءِ سر ءَ وھدے کہ آ ارزبند ورگ ءَ اِت اَنت، جْوانیں لوگبانک ءَ وتی ھمساھگ دیست کہ شُشتگیں گُداں ڈَنّ ءِ سر ءَ تاپ ءَ دیگ ءَ اَت۔

 

 " اِے گُد ساپ ءُ پلگار نہ اَنت، اِے جنین نہ زانت کہ چتور شَرّی سر ءَ گُداں بہ شود آں۔ بگندئے آئی ءَ گھتریں سابونے کارمرز کنگ ءِ زرورت اِنت"۔

 

آئی ءِ جود اِے ندارگ ءَ چاران اَت بلے ھاموش اَت۔

 

ھردیں کہ آئی ءِ ھمساھگ ءَ شُشتگیں گُد ھُشک بیگ ءِ ھاتر ءَ پہ تاپ ءَ دیگ ءَ دْرتک اَنت، جوانسالیں لوگبانک ءِ دانک ءُ ھبر ھمیش اِت اَنت۔

 

یک ماھے ءَ پد، ساد ءِ سر ءَ دْرتکگیں پھک ءُ سلّھیں گُدانی گِندگ ءَ زال بھمانگ بوت ءُ گوں وتی لوگواجہ ءَ درّائینت ئِے،

 

" بِچار، گُڈّسر ءَ زال ءَ دربرت کہ چتور شَرّی سر ءَ گُد شودگ بنت۔ من اجکّہ آں کہ آئی ءَ اِے پیم شودگ کَے ءَ ھیل داتگ؟"

 

مرد ءَ پسّو دات، من مروچی سُھب ءَ مھلہ پاد اتکگ آں ءُ مئے لوگ ءِ دریگ ساپ کُتگ آں۔

 

ءُ ھمے پیم مئے زندگی اِنت ھم ۔۔۔ دگرانی چارگ ءِ وھد ءَ ما ھرچی گِند اِیں اِے چیز گوں ھما دریگ ءِ ساپی ءُ پلگاری ءَ بندوک اِنت کہ چمائی ءِ تہ ءَ ما چار اِيں۔

 

گڑا دگہ مردمانی بابت ءَ پیسلہ دیگ ءَ سکّ تاجیل ءُ اشتاپ مہ کن ھاس کن ھما وھد ءَ کہ تئی زند ءِ ھیال ءُ لیکہ، تئی زند ءِ دیدانک زھر، کست ءُ کینگ، ھرابی ءُ نہ سرجمیں واھشتاں پیڑاتگ اَنت۔

 

" یک مردمے ءِ بابت ءَ پیسلہ کنگ اِے چیز ءِ گیشّواری ءَ نہ کنت کہ آ کے اَنت بلکیں ھمے پدّر کنت کہ تو کَے ئے۔"

 

 

سَرشون:

 www.paulocoelhoblog.com/2019/09/25/the-dirty-laundry/