گِدار نبیسّی ءِ اِزم

 

  

نبشتہ کار: زِلّ بُکاری

رجانکار: اُزیر مھرؔ

 

گِدار چی یے؟

گِدار چتور نبیسّگ بہ بیت؟

 

گِدار ءَ چہ انگریزی لبزانک ءَ پند بُرّان کُتگ ءُ پد ءَ اردو لبزانک ءَ اتکگ ءُ اِے انگریزی لوزے کہ بُن اسل ءَ چہ اٹلی زبان ءِ لبز ناویلا ءَ (Novella) زیرگ بیتگ۔ ایشی ءِ مانا اِنت نوکیں چیز۔ داستان ءِ تہ ءَ پرزی کِسّہ بیت بلے گِدار ءِ کِسّہ گْواچن ءُ راستی ءِ سر ءَ جوڑ بیت۔ ھرچنت پکشن ءَ گِدار ءِ سر ءَ سان دور داتگ ءُ بُرز ابرمیں(ما فوق الفطرت) کارست ءُ کِسّھانی چپّ ءُ چاگرد ءَ تَرّوکیں گِدار گِندگ ءَ ھم پیداک اَنت ءُ منّگ اوں بیگ ءَ اَنت بلے گِدار ءِ بُنھشت راستی ءِ سر ءَ بہ بیت جْوان تِر اِنت۔ گِدار شَرّی ءُ گھتری ءِ  اوں بیت کن اَنت ءُ لبزانکی داب ءِ ھم۔ انچوش کہ ڈپٹی نزیر اھمد ءِ گِدار پنت ءُ نسیتی یے ءُ اِے پیمیں پنت ءُ نسیتی گِدار باز براں بیزار کن اَنت بلے ایشی ءِ متلب اِے ھم نہ اِنت ڈپٹی نزیر اھمد ءِ گِدار پھریگ کن اَنت۔

 

گِدار ءِ باز تھر ءُ دْروشم ھست اَنت:

۱۔ پنت ءُ نسیتی

۲۔چاگردی

۳۔سیاسی ءُ راجکاری

۴۔ مزن کاری یا جنگی

۵۔ چاریگی یا جاسوسی

۶۔ دیدانکی

۷۔ مھرانکی

۸۔ گْواچنی

۹۔ راجدپتری

۱۰۔ سائنس پکشن

۱۱۔ ھیالی یا پینٹسی

 

اِے داب ءُ دْروشمانی تہ ءَ تو گِدار نبیسّ اِت کُت کن ئے۔ تو کْوھنیں یا وتی دلدوستیں گِدار ءَ بْوان۔ بانو کدسیہ، اشپاک اھمد، ھاجرہ مسرور ءِ پیمیں گِدار نبیسّاں بہ وان۔ وھدے کہ تو ایشاں وان ئے ترا دوست بنت۔ چریشی ءَ ترا وتی گِدار ءِ درشانداب ءِ اندازہ ھم بیت کہ چتور نبشتہ کنگی اِنت۔ چہ کتاب وانگ ءَ تو تیار بیگ ءَ ئے اگاں تو بیرگ ءَ نوکباھندے ئے گڑا تچک ءَ گِدار بندات کنگ ءِ بدل ءَ آزمانک ءِ بندات کنگ الّمی اِنت۔ اِے رِد ءَ کم ءَ چہ کم دہ پانزدہ آزمانک پیسر نبشتہ بہ کن کہ بُندر ءَ آزمانک ءِ راہ ءُ راھبندانی تہ ءَ بہ بنت۔ ھر ھیالے کیت آئی ءَ وتی رجسٹر، رودپتر ءِ تہ ءَ نبیسّ ءُ پھاز اِش بہ کن۔ کارستانی بھر ءُ بانگ کنگ ھژدری اِنت چریشی ءَ تئی کِسّہ پدّر بیت ءُ گیشّ اِیت۔ چہ آھانی گپ ءُ گالاں، آھانی دْروشم ءُ گوناپاں کسان ءُ ایرتیں وِچّوراں نبشتہ بہ کن۔ اِے چیزاں تو کاگد ءِ سر ءَ نبشتہ کُت کن ئے، کمپیوٹر ءُ موبائلانی سوپٹ وئیرانی تہ ءَ اوں نبشتہ کُت کن ئے۔ پہ درور:

Microsoft Office Word

Note Pad

Evernote

Memo

اِے پیمیں سوپٹ وئیرانی تہ ءَ تو نبشتہ ءُ سمبال اِت کُت اِش کن ئے ۔

 

گِدار نبیسّگ ءِ مول ءُ مراد چی اِنت؟

ترا زانگ لوٹ اِیت کہ تئی مول ءُ مراد چی اِنت۔ اراں تھنا وشنودی ءُ مزہ ءِ ھاتر ءَ نبیسّگ ءَ ئے؟ یا چریشی ءَ چاگرد ءِ شَرّی ءُ گھبودی تئی مول ءُ مراد اِنت۔ اسل ءَ گِدار ءِ تہ ءَ باید اِنت یک سوج ءُ پنتی تک ءُ پتھناتے مان بہ بیت۔ پیسر ءَ اِے گپّ ءَ بہ گیشّین کہ گِدار تھنا لبزانکی یے بیت یا پنت ءُ نسیتی یے۔ اِے لبزانتانی لیکہ اِنت کہ نسیتی پھناتے موجود بہ بیت اگاں نا راھبندانی رِد ءَ تھنا لبزانکی یا پنتی گِدار اوں گِدار گْوشگ بیت۔ لیو ٹالسٹائی ءِ گِدار جنگ ءُ ایمنی ءِ تہ ءَ ندکار ءَ وتی دیدانک یک وڑے ءَ وانوکاں سر کُتگ اَنت۔ آئی ءَ اِے گپّ ءِ گْوشگ ءِ زرورت نہ اَت کہ آ گوں کجام ٹولی ءِ لیکہ ءَ سیادی دار اِیت۔ تو کارستانی سبب ءَ وتی دیدانک ءَ گْوشت کُت کن ئے وتی دیدانکانی ھکّ ءَ منّانک دات کُت کن ئے۔ چیدگی گِدار اوں نبیسّگ بیت کنت انچوش کہ جارج آرویل ءِ گِدار اینیمل پارم یا انتزار ھسین ءِ گِدار آخری آدمی۔

 

بُرز ابرمی(مافوق الفطرت)  کارستانی سر ءَ نبشتہ کنگ ءِ بدل ءَ سائنس پکشن گیشتر دوست تِر لیکگ بیت بلے نی تب ءُ میل مَٹّ بوان اِنت ءُ نی آ اوں منّگ بیگ ءَ اَنت۔ اگاں اِے پیمیں گِدارانی اوں مول ءُ مراد شَرّی اصلاحی بہ بیت گڑا گھتر اِنت۔ لارڈ آپ رنگ ءُ گیم آپ تھرون ءِ درور موجود اَنت۔

 

 

گِدار ءِ تہ ءَ رومانس ءِ بھر

اِے الّمی نہ اِنت۔ مزن مزنیں گِدار نویسّاں سنگینیں گِدارانی تہ ءَ اوں رومانس ءِ بھرے مان کُتگ پرچا کہ اِے یک مھکمیں بھرے ءُ وانوک ءَ گوں وت دار اِیت بلے ایشی ءَ ابید ھم گِدار گِدار گْوشگ بیت۔

 

 

گِدار ءِ تہ ءَ نِدارگ سازی

گِدار ءِ تہ ءَ اگاں بے کساس نِدارگ سازی بیت گڑا آئی ءِ مراد ھتم بیت وانوک بیزار بیت۔ زرورت ءِ ھساب ءَ نِدارگ کَشّی کنگ بہ بیت۔ انچوش کہ بُتگِر چہ پیمیں چیزے؟ بُتگِر ءِ ھر چیز ءِ گْوشگ ءِ زرورت نہ اِنت۔

 

گِدار ءِ لوٹ ءُ گزرانی تہ ءَ پلاٹ، کارست، گُپت ءُ گال، کِسّہ، ءُ کِسّھی گْوناپ ءِ بیگ الّمی اِنت۔ کِسّہ وَ بہ بیت بلے آ کِسّہ ءِ بدل ءَ بیانیہ داب ءَ نبشتہ کنگ بہ بیت گْوش ئے زاناں کسے نبشتانک وانگ ءَ اِنت تاں آ گِدار گْوشگ نہ بیت۔ اگاں گِدار ءِ تہ ءَ ایوک ءَ گال ءُ گُپتار بہ بنت کِسّہ مان مہ بیت پد ءَ اوں گِدار گْوشگ نہ بیت۔

 

 پیتّاری المی اِنت؟

پیتّاری ءُ وسّریں رِدسازی ءِ ھِچّ وڑ ءَ زرورت نہ اِنت۔ کْوھنیں گِدار گرانیں درشانداباں نبیسّگ بیتگ اَنت بلے نگدکار ءُ لبزانتانی ھیال ھمیش اِنت کہ درشانداب ھمروچیگیں ءُ آسانیں زبان ءَ بہ بیت پرچا کہ مول ءُ مراد ھمیش اِنت کہ وانوک  ئِے بہ وان اَنت۔ اگاں آ ونت ئِے مہ کن اَنت گڑا مول ءُ مراد کجا رس اِیت۔

 

 یک گِدارے ءَ چتور جھانگیریں مکامے رس اِت کنت؟

کِسّہ اگاں جھانگیرے بہ بیت گڑا گِدار وت جھانگیرے بیت۔ بازیں کارست ابدمان بنت۔ آئی ءِ سبب ھمیش اِنت کہ آئی ءِ کِسّہ ءَ کارست نمیران کُتگ اَنت۔ انچوش کہ راجہ گِدھ ءِ تہ ءَ کیّوم ءُ سیمی ءِ کِردار۔

 

کارستانی کَچّ ءُ کِساس

گِدار ءِ تہ ءَ کارست باز بنت ءُ آھانی گوں کِسّہ ءَ تچک ءَ یا وڑے نہ وڑے ءَ سیادی یے بیت ءُ آ وت ماں وت ءَ اوں ھور ءُ تور بنت۔ بلے آزمانک ءِ تہ ءَ یک یا دو کارست بنت پہ درور ٹالسٹائی ءِ گِدار جنگ ءُ ایمنی ءِ تہ ءَ شَش سد کارست اَنت۔ بلے الّم نہ اِنت کہ اینچو باز کارست بہ بنت۔

 

گِدار ءِ نبیسّگ ءِ تہ ءَ بُرز ءُ جھلی بہ بیت بلے اِے پیم ھم مہ بیت کہ پھک ءَ یک نیمگے بہ روت ءُ پد ءَ اناگت ءَ دومی نیمگ ءَ سر بہ کَشّ اِیت ءُ پد ءَ کسے سرپد مہ بیت کہ چتور اِے بدلی ءُ سدلی اتک۔ کِسّہ ءِ تہ ءَ بیگی اِنت ءُ اِے دْراھیں تک ءُ پھنات چارگی اَنت۔

 

کارِست (کِردار) سازی

کارستانی گوناپ، گوں کِسّہ ءَ آھانی سیادی، آھانی گال ءُ گُپتار اِے دْراھیں چیزاں پہ ایرتچاری ءُ سرجمیں درنگازی ءَ نبشتہ اِش بہ کن دانکہ جیڑھے پیش مئیت۔

 

پد ءَ کِسّہ ءِ شِکل ءُ سورت ءَ ھشت یا دہ تاک ءِ تہ ءَ جوڑ کن ءُ اِے سیب کار ءَ یک شَرّیں نبشتہ کارے ءَ پیش بہ دار ءُ شَور بہ کن۔

 

گِدار ءِ تہ ءَ :۱۔ بندات ۲۔ کلائمکس ۳۔ آسر

آسر ءَ کِسّہ ءِ جیڑہ توجیل بیت بزاں بندات ءَ ھما کِسّہ ءَ کہ سر کَشّ اِتگ آ مدان مدان ءَ پدّر بوان کنت ءُ مارا سبب مالوم بنت کہ اِے چیز اِے پیم اِنت گڑا ایشی ءِ باپشت ءَ چی سبب بیت کنت یا اگاں اِے چیز بوت گڑا ایشی ءِ آسرال ءُ آکبت چی درکیت۔ وانگ ءِ ھاتر ءَ پرانسیسی ءُ روسی نبشتہ کارانی رجانک بیتگیں گِداراں وان۔۔ گِدار نبیسّی آھانی جْوان تِر ءُ توَنگر تِر اِنت۔