لچّہ: مھر ءِ ملاریں واب

 

 

 

 لچّہ کار: انیتی نسر ۔ امریکہ

رجانکار: اُزیر مھرؔ

 

 

۱۔ گُمسار

 

اِے کوٹی ءَ من ایوک آں جیڑگ ءَ آں پرچیا؟

منی گرنچ بستگیں سینگ ساچشتکاريں دستاں نبیسّگ ءَ داریت

ءُ واھگداریں مجگ ءَ جیڑگ ءَ نئیل اِیت

ھیال ءُ لبز زورآوریں مُجے ءَ پیڑاتگ اَنت

پاد پرش ءِ سر ءَ گران اَنت، ارواہ ءِ جھگ ءَ دارگ ءَ انت

فون ءِ نیمگ ءَ چارگ ءَ آں بلے لنکک سُنّ انت ڈائل کت نہ کن آں

یک گُلباگ پروشیں، بے چڑکھیں توارے چہ نیمون ءَ کپ اِیت

ءُ کلیتاک انگت یک اجبیں ازبابے

اے روچ بد اِتگ اَنت ءُ بیکار درا بنت

اگاں یک چیزے ءَ مانا بہ داشتیں بگندئے گڑا بگندئے تھنا وت سریں لبز شتور گِپت اَنت ءُ تو اِے کوٹی ءِ تہ ءَ درا بوت ئے

من ایوک آں

انچوش بے برمش آں انچوش کہ اِے سینگ ءِ تہ ءِ بستگیں گرنچ

اِے مجگ ءَ وَ گْوش آں شموش ئِے بلے اِے دل اِنت کہ گُمسار اِنت۔

 

 

 

۲۔ من پد ءَ اوں گوں تو مھر کن آں

 

اِے چیز ءَ باکے نیست کہ تو لاگر ئے یا جان ءَ پُرّ ئے

من پد ءَ اوں گوں تو مھر کن آں

پرواہ نیست کہ تو اَچ من شیوّار تر ئے

یا من اَچ تو چالاک تِر آں، من پد ءَ اوں گوں تو مھر کن آں

چی بیتگ تو اگاں کمے اجب ئے

یا جتائیں تبے ءِ واھند ئے، من پد ءَ اوں گوں تو مھر کن آں

تو وتی اندری دنیا ءِ مساپرے ئے

یا ڈنّی دنیا ءِ سوادی ئے، من پد ءَ اوں گوں تو مھر کن آں

ھِچّ پرواہ نیست کہ تو زرورت ءِ وھد ءَ زور

یا نزوری یے پیش دارئے، من پد ءَ اوں گوں تو مھر کن آں

ھِچ جیڑہ نہ اِنت تو اگاں چہ جتائیں جاھے ءَ سیادی دارئے

ءُ چہ منی ھند ءُ دمگ ءَ ابید دگہ کَلگ، شھر یا مُلکے ءِ جاھمنند ئے

 من پد ءَ اوں گوں تو مھر کن آں

ڈیل ءُ بالاد، درجگ ءُ مُکام ءِ پرواہ نیست

تھنا تو، ھاس تو، تیوگ ءَ تو مئے اِے جلگھیں جھان ءَ،

بس تو، سرجم ءَ تو، تئی تیوگیں وجود، تئی سادگی، تئی اِنان مانا دار ایت

من پد ءَ اوں گوں تو مھر کن آں

سکّی ءُ وشّیاں

ایمنی ءُ بے تاھیریاں

ھر یک کترہ، ملٹ ءُ ساھت ءَ

تو پد ءَ اوں پمنّ ارزشت دارئے

من گوں تو مھر کن آں

 

 

 

۳۔ مھر سِنگ ءِ سر ءَ نبشتگ

 

گوں وتی لنککاں من دست جن آں روچ ءُ ماہ ءَ

ٹِکّاں جوڑین آں

زند ءَ جوڑین آں

آزمان ءُ زمین ءِ لکّواں بُرز؛ کہ سکّ نزیک درا بیت

ءُ پد ءَ اوں من جلّ ءُ مجلّ آں

انیگیں ءُ رند ءِ میان ءَ اڑ اتگ آں

بے چڑکہ آں، تھنا جیڑگ ءَ آں

کہ من اولی رند ءَ چتور اِے جاہ ءَ سربیتگ آں

 

باریں ما لھتیں نامی کرامتی ساچشت اِیں یا

تھنا ھیالی جوڑشت اِیں

نبیس اِتگیں تاکے  ءِ واب اِیں

 

من وتی جان ءَ دست جن آں

گلابی ئیں گوشت، کھربائیں سوزمانیں درد ءَ چینڈُک پاچ آں

ءُ راستی ءِ نیمگ ءَ تر آں

تئی شائریں ھیال منی کَش ءَ پُلّانی گندل ءِ سر ءَ ایریں  سِنگ ءِ سر ءَ نبشتگ

 

 

 

 

۴۔ من مھکمیں ھاتونے آں

 

پہ ھُدائی من ءَ چو نِزور مہ لیک کہ من گریو آں،

 آ زالبول ءَ گُشت

زالبول دلانی جیڑھاں سک آزگ سما اَنت

اِے ارس کہ من شلان اِش

مھکمی ءِ چیدگ اَنت

من اگاں جوزگ پیش مہ داشتیں

تو بنگدئے ھمے لیک اِتگ کہ

من گوں تو مھر نہ کن آں

پد ءَ اوں اِے منی دل ءِ داب اِنت

کہ ترا بگوش آں من گوں تو مھر کن آں

 

 

 

 

۵۔ آ دگہ مردمے

 

آ جھانی مھر ءَ چہ منی شناسیں ھرمردم ءَ گیشتر لیک ایت

انچوش گُشئے زاناں آ کازماس ءَ ھما دیم وھد ءِ دگہ ھلکھے ءَ سیادی داریت۔

آ ارواھی جھان ءَ ایر اتکگ

آئی ءِ پُر جوزگیں گُپتار،

پاک ءُ دل ءَ ایرکپوکیں مھری تران

سک تچک ءُ

سک باز شر

مھر ءُ مھبت ءِ گوات پہ آئی ءَ آرگ بیتگ

کہ وتی مھگونگ ءِ امبازاں واتر بہ روت

 ارواہ ءِ دگہ بوتنے، دگہ نوکی یے پدّر بہ بیت

زیمر ءِ بیلّ ءُ آلاڑ توانا تر بہ بیت

زندگی وتی اسیلیں دْروشم ءَ سھرا بہ بیت

آ وتی یک ءُ ھکّ ءُ دلیں دوستدار ءِ گون پد ءَ ھور بہ بیت

 

 

۶۔ مھر ءِ کتاب

 

بیگاہ ءَ تاکے سُچ اِیت

ءُ اَچ وت ءَ من جست کن آں پرچیا؟

سُھب ءَ وھدے کہ مھر ءِ کتاب سکّ سرّیچ بیت

گرمی ءِ یک مزن ءُ پھمیانیں راھے

منی دل ءُ جان ءَ وران کنت۔

 

 

۷۔ ارس مُھکمی ءِ چیدگ اَنت

 

توری ھرچی سگّگ بہ بیت، یات بہ دار کہ ارس  ۔گریوگ۔ تاکت ءِ چیدگ اَنت۔

 

 

 

۸۔ مھر ءِ ملاریں واب

 

بال گِروکیں پردہ

گرماگ ءِ سمین ءَ میزان ءَ ناچ کن اَنت

منی ءُ تئی وشّ ءُ اسیلیں ھیال

مھر ءِ آسمانی ءُ سرمستيں واب ءِ تہ ءَ سُھبت کن اَنت

 

 

۹۔ تھنا

مَرگ ءَ گوں کس ءَ نیمونے نیست

تھنا ھاموشی سنگینیں گواتے بیتگ

ءُ ارواہ ءِ گُڈّی پُرس ءِ روچانی سر ءَ کشّ اِتگ ئِے

اَے دلبریں رپتگیں ارواہ

من چی کُت کن آں

وھدے کہ تو چہ منی زندگی ءَ اندیم بیتگ ئے

من چتور بے تو تھنا زندگ بیت کت کن آں؟

 

 

 لچّہ کار ءِ گْونڈیں پجّارے۔

 

انیتی نَسر امریکہ ءِ جاھمنندیں نبشتہ کار، لبزانت، اکس کشّ، ءُ میان استمانی لبزانک ءُ اِزم نامیں آنلائن تاکبندے ءِ سرشونکارے۔ انیتی ءِ لَچّھانی بُنگپ مھر، جتائی، درد ءُ تورشت، مَرگ، ابرم دوستی ءَ ابید گوں وت مھر، ارواھی ءُ پاکسمائی ءِ چوتاریں رنگاں وتی توانمندیں ند ءِ زیبائی ءَ لچّھاں گوناپ بکش اِیت۔

https://www.ilamagazine.net/