وشّی ءِ چمّگ بُج اَنت

 

گوتم بُدھ ءِ گُشتن

رجانکار: اُزیر مھرؔ

1۔ ھجبر باور مہ کن توری تو جاھے ونتگ یا کسے ءَ ترا گُشتگ یا بے شک توری آ  انچیں گپے کہ من ترا گُشتگ داں ھما وھد ءَ کہ ترا چہ تئی اندر ءَ آگاھی نہ رس اِیت ءُ تئی مجگ ئِے مہ منّ اِیت۔ پمیشکا اِے ھژدری اِنت کہ تو باید اِنت وتی آگاھی ءُ مجگ ءَ بودناک ءُ توانمند بہ کن ئے۔

 

2۔ اِے دُنیا ءِ تہ ءَ چہ درستاں گیش کہ کسے مھر ءِ لائک اِنت آ تو وت ئے۔

 

3۔ ایمنی چہ تئی اندر ءَ مِسل ء چمّگ ءَ بُج اِیت اِنت ایشی ءَ چہ وت ءَ ڈنّ مہ شوھاز۔

 

4۔ ھرچی جیڑئے ھما جوڑ بہ ئے۔

 

5۔  ترا چہ تئی زھر ءُ کینگ ءِ سبب ءَ شزا دیگ نہ بیت، کست ءُ زھر وت یک شِزایے۔

 

6۔ گوں وشّی ءُ ھُبّ ءَ سپر ءَ بیگ چہ منزل ءَ رسگ ءَ گھتر اِنت۔

 

7۔ وتی سر ءَ وت باج برگ چہ ھزار جنگانی کٹّگ ءَ گھتر اِنت۔ تو تھنا ھما وھد ءَ باجبر گُشگ بہ ئے۔ اِے انچیں باجبری یے کہ ایشی ءَ چہ ترا کسے پچ گپت کُت نہ کنت، نہ پریشتگ، نہ شیتان، نہ بھشت،نہ دوزہ۔

 

8۔ زھر ءُ کُنّت گوں زھر ءُ کُنّت ءَ ھلاس بیت کُت نہ کنت۔کسے ءِ دل ءَ مھر ءِ پیداک کنگ ءِ ھاتر ءَ گوں آئی ءَ زھری ءُ کُنّت ءِ روِشت ءَ پیش آیگ نہ بیت۔ ھمے ابدی ءُ مُجّتی رھبند اِنت۔

 

9۔ جسم ءَ را بہ چیٹ ءُ سلامت بہ کن اگاں ناں تئی ھیال ءُ دیدانک دنز ءُ مُجین بنت۔

 

10۔ راستی ءِ راہ ءَ مردم دو ردی کُت کنت، یکے وَ ایش اِنت کہ راستی ءِ نیمگ ءَ سپر ءَ بندات نہ کنت، دومی ھمیش اِنت کہ نیم راہ ءَ دلتپرکہ ءُ دلپروش بیت۔

 

11۔ چہ ھزاراں پوچ ءُ بے کاریں لبزاں ھما یکیں لبز گھتر اِنت کہ چرآئی ءَ ایمنی ءِ کُلوہ پدّر بیت۔

 

12۔ ترا چہ تئی جند ءَ ابید کسّ رکینت کُت نہ کنت، ترا راہ وت گیشّینگ ءُ شوھازگی اَنت۔

 

13۔ دلجمی دنیا ءِ درستاں چہ مستریں کیمتی ھزانگ اِنت۔ اگاں دلجمی مہ بیت گڑا آسمان ءُ زمین ءِ دراھیں ھزانگ رسگ ءَ پد ھم ترا وشّی دات کُت نہ کن اَنت۔

14۔ تھنا چہ یک چراگے ءَ ھزاراں چراگ رُژنا بیت کُت کنت ءُ آ چراگ ءِ رُژن کم نہ بیت۔ وشّی ءِ چراگ ھم انچو رُژنا بیت بس وشّی بھر بہ کن۔

 

15۔ وتی زھر ءُ کُنّت ءِ سر ءَ اوشتگ انچوش اِنت انچوش کہ کسے روکیں اِشکرے دست ءَ بہ کنت۔ چریشی ءَ پیسر کہ دگہ کسے ءَ نُکس ءُ تاوان بہ بیت، تئی وتی دست سُچ اِیت۔

 

16۔ ھیال ءِ جُھلانکی ءِ رسگ ءِ راھبند ھمیش اِنت کہ نہ گوست ءِ سر ءَ اِنان بہ دئے ءُ نئیکہ باندات ءِ سر ءَ بلکیں ھستیں زمانگ ءِ سر ءَ دلگوش ءَ بہ دئے۔

 

17۔ نہ آس، نہ گوات، نہ زندگی، نہ مَرگ، ھِچّ چیز تئی کار ءُ کُنِشاں زیان نہ کنت۔ ھرچی کِش ئے، ھما الّم رُد اِیت۔

 

18۔  ھرچیز ھیال اِنت۔ ھرچی کہ جیڑئے ھما جوڑ بہ ئے۔ اَنّی ما ھرچی ھست ءُ جوڑ بیتگیں مئے ھیالانی برورد اِنت۔ وھدے کہ مجگ ساپ ءُ سلّہ بیت گڑا وشّی انچوش پد ءَ کپ اِیت انچوش کہ ساھگ۔