مھر ارواہ ءِ رُژن اِنت

مولانا جلال الدین رومیؒ ءِ دُرّیں دانک

رجانکار: اُزیر مھرؔ

1۔ مھر کنوک آسر ءَ جاھے ءَ دوچار نہ کپ اَنت۔ آ ھر وھد ءَ یک دومیگ ءِ تہ ءَ ھور ءُ ھوار اَنت۔

2۔پیسر ءَ منی ھزار واھشت بیتگ اَنت، بلے تئی زانگ ءِ منی ھمے یکیں واھشت ءِ تہ ءَ منی آ دراھیں واھشت ھلاس ءُ آپ بوت اَنت۔

3۔من تئی مھر ءِ تہ ءَ انچو ھلاس ءُ پنا باں انچوش کہ روچ ءِ رُژن ءُ روتاب ءَ جمبر ءِپٹہ ھلاس ءُ پنا بنت۔

4۔وھدے کہ من تئی ھمراہ آں، ما دراھیں شپ ءَ آگاہ بئیں۔ وھدے کہ تو اِد ءَ نہ  بئے، من وپت کت نہ کناں۔ ھُداوند ءِ لک شکر اِنت پہ اِے دوئیں بے وابیانی ھاتر ءَ ءُ ایشانی دگری ءُ تپاوت ءِ تہ ءَ۔

5۔ تو من ءَ ھجبر شوھاز اِت کت نہ کن ئے پرچا کہ من چہ بندات ءَ تئی ھمراہ ءَ آں۔

6۔مھر تئی ءُ ھر چیز ءِ میان ءِ پھُل اِنت۔

7۔اگاں تئی دل ءِ تہ ءَ رُژن ھست تو  وتی لوگ ءِ راہ ءَ دیست کن ئے۔

8۔یک تیوگیں دلے ءَ گِس ءَ برگ ءُ رسینگ ءِ ھاتر ءَ باید اِنت یک ھزار نیم بُندگیں مھرانگار کنگ بہ بیت۔

9۔سبر ءُ اوپار نندگ ءُ ودار کنگ ءِ نام نہ اِنت۔اِے پیش گندگءِ نام اِنت۔ اِے شپ ءِ چارگ ءَ گوں روچ ءِ گندگ اِنت۔ مھر کنوک سبر ءُ اوپار کنوک اَنت ءُ زان انت کہ نوک ءَ وھد لگ اِیت کہ تیوگیں ماھے بہ بیت۔

10۔یک نازرکیں راستی یے ھست کہ: تو ھما ئے کہ ھما چیز ءَ را مھر کن ئے۔

11۔مھر ءِ تہ ءَ ھنوش  ءُ ملار بہ بئے پرچا کہ مھر ھرھما چیز اِنت کہ وجود دار اِیت۔

12۔وتی چماں بند بہ کن، مھر ءِ زر ءَ ایر کپ ءُ ھمد ءَ بہ جلّ۔

13۔تئی کار مھر ءِ شوھازگ نہ اِنت بلکیں تھنا ھمیش اِنت کہ وتی تہ ءَ ھما دراھیں گٹ ءُ گراں بہ شوھاز ئے کہ تو مھر ءِ بگیر ءَ جوڑ کتگ اَنت۔

14۔من تئی گوشاں راز ءُ اسراراں ھلوت کن آں، توبس سر ءَ سُرین ءُ ھاموش بہ بئے۔

15۔مھر ءَ من ءَ را گشت کہ چُشیں ھِچّ چیز نیست کہ من نیاں۔ ھاموش بہ بئے۔

16۔من تئیگ آں من ءَ را پد ءَ من ءَ مہ دئے۔

17۔من اِد ءَ تئی ھاموشی ءِ پرشگ ءِ تئی ارواہ ءِ پاد آیگ ءِ، تئی مھر ءِ بیدار بیگ ءِ ودار کن آں۔

18۔ مھر هچّ بُنپد ءُ بُنیاد نیست۔ اِے یک شھشنابیں زِرے نہ بندات ئِے ھست ءُ نئیکہ آسر۔

19۔چہ دیر ءَ تو ایوک ءَ منی رُژن ءَ  گندئے، نزیک تر ءَ بیا ءُ بہ زان کہ من تو آں۔

20۔ایوکیں پائیدار ءُ مجتی زیبائی دل ءِ زیبائی اِنت۔

21۔الوداع تھنا پہ ھما مردمانی ھاتر ءَ اِنت کہ گوں چماں مھر کن اَنت پرچا کہ ھما گوں دل ءُ جان ءَ مھر کن اَنت پہ آھاں جتائی ءِ پیمیں ھِچّ چیز نیست۔

22۔وتی زند ءِ آس ءَ بلین ءُ ھما مردماں بہ شوھاز کہ تئی زند ءِ آس ءِ  برانزاں بلین اَنت۔

23۔تئی رُژن ءِ برکت ءَ من مھر کنگ دربر آں۔

24۔مھر تیوگ ءُ کاملیں شے اِنت ما تھنا آئی ءِ بھر ءُ ٹکر اِیں۔

25۔من اگاں وت ءَ مھر کن آں، گڑا بزاں من ترامھر کنگ ءَ  آں۔ من اگاں ترا مھر کن آں، گڑا بزاں من وت ءَ مھر کنگ ءَ آں۔